Partia Demokratike e Kosovës ka reaguar pozitivisht ndaj aktgjykimit të Gjykatës Kushtetuese, e cila ka rrëzuar vendimet për miratimin e 13 ligjeve të votuara më 5 dhjetor 2024, për shkak të shkeljeve procedurale gjatë procesit parlamentar.
PDK-ja ka vlerësuar se ky vendim përforcon bindjen se Kuvendi, nën udhëheqjen e shumicës aktuale, ka vepruar në kundërshtim me parimet kushtetuese dhe rregulloren e brendshme. Sipas PDK-së, është cenuar roli i deputetit, funksionimi i komisioneve parlamentare dhe parimi i ndarjes së pushteteve.
Partia opozitare thekson se Gjykata Kushtetuese ka konstatuar se procedurat ligjvënëse janë shfrytëzuar si mjet presioni politik, duke devijuar nga standardet demokratike të vendimmarrjes.
Në këtë kontekst, PDK-ja nënvizon se veprimi i saj opozitar ka qenë institucional dhe i orientuar drejt mbrojtjes së rendit kushtetues.
“Aktgjykimi dëshmon se procedurat parlamentare janë përdorur si instrument force politike dhe jo si mekanizëm demokratik i vendimmarrjes. Konstatimet e Gjykatës Kushtetuese nxjerrin në pah rëndësinë e veprimit opozitar të përgjegjshëm të PDK-së, e cila ka zgjedhur rrugën institucionale për të mbrojtur rendin kushtetues përballë një qeverisjeje që ka shfaqur prirje të vazhdueshme antikushtetuese dhe përqendrim të kundërligjshëm të pushtetit”, thuhet në komunikatën e PDK-së. /teve1.info/
