Ekipet e Agjencisë së Ushqimit dhe Veterinarisë destinacion të hënën patën një fermë në Kllokot.
Pasi atje u shfaq Sëmundja Murtaja Afrikane e Derrit për herë të parë në Kosovë.
E pas lajmërimit për dyshime të prezencës së kësaj sëmundje u morrën mostrat dhe u bë izolimi i fermës.
“Ferma është e prekur nga sëmundja afrikane e derrit dhe menjëherë janë urdhëruar ekipet tona të inspektorëve që të kryhet asgjësimi i shpejtë, të shpallet zonë karantine me perimetër qysh është e përcaktuar me ligj dhe ne do t’i mbajmë të monitoruara të gjitha zonat përreth”, tha Lamir Thaçi nga AUV.
Megjithatë sipas AUV-it, kjo sëmundje nuk përhapet tek njerëzit por këta kanë një porosi për fermerët.
“Deri më tash nuk ka ndonjë hulumtim shkencor që kjo sëmundje mund të bartet edhe tek njeriu, por në anën tjetër ne apelojmë tek fermerët që nëse një kafshë ka shenja simptomatike të ndonjë sëmundje, në asnjë mënyrë të mos i therrin ato kafshë për konsum”, shtoi ai.
Thaçi ka bërë të ditur se duke u bazuar në ligjet në fuqi, AUV ka themeluar shtabin e krizës.
Po ashtu gjuetarët duhet të lajmërojnë AUV-në, në çdo raste kur hasin derr të ngordhur në pyje në mënyre qe të izolohet përhapja e sëmundjes.
Teksa kjo agjenci bën me dije që ka nisur kontaktimi i fermerëve mbarështues të derrave për aktivizim të masave vetëmbrojtëse të biosigurisë ne fermat e tyre.
Murtaja Afrikane e Derrit është sëmundje ngjitëse që shkakton ethe hemorragjike tek derrat e butë dhe derrat e egër, ndërsa përcillet me letalitet të lartë deri në 100 përqind.
