Shërbimi i Kërkim-Shpëtimit Malor i Kosovës ka lëshuar një paralajmërim për qytetarët dhe pasionantët e aktiviteteve në natyrë, duke theksuar se kushtet e motit do të përkeqësohen ndjeshëm nga mesnata e 2 tetorit 2025.
Bazuar në parashikimet sinoptike, pjesa më e madhe e Ballkanit, përfshirë edhe Kosovën, do të përfshihet nga një mot me tipare të theksuara dimërore. Në zonat malore pritet rënie e ndjeshme e temperaturave dhe reshje dëbore me intensitet të lartë, duke sjellë kështu një “fillim të parakohshëm të dimrit”.
Autoritetet kërkojnë kujdes të shtuar nga të gjithë ata që planifikojnë aktivitete malore.
Sipas njoftimit:
Itinerarët duhet planifikuar me kujdes, duke marrë parasysh ndryshimet e motit.
Shumë shtigje verore do të jenë të pakalueshme dhe veçanërisht të rrezikshme.
Shtigjet malore do të bëhen të rrëshqitshme dhe kalimi pa pajisje të përshtatshme dimërore mund të jetë tepër i rrezikshëm.
Kërkohet përdorimi i veshjeve dhe këpucëve adekuate dimërore për të shmangur hipoterminë dhe rreziqe të tjera.
Shërbimi i Kërkim-Shpëtimit Malor apelon që të gjithë qytetarët të tregojnë kujdes të shtuar në ditët në vijim dhe të mos nënvlerësojnë gjendjen e rënduar atmosferike.
