Ministria e Shëndetësisë (MSh) dhe Instituti Kombëtar i Shëndetësisë Publike të Kosovës (IKShPK), në bashkëpunim me partnerët ndërkombëtarë si Organizata Botërore e Shëndetësisë dhe UNICEF, kanë shënuar Javën e Imunizimit, duke ritheksuar rëndësinë e vaksinimit si një ndër shtyllat kryesore të mbrojtjes së shëndetit publik në vend.
Motoja e këtij viti, “Vaksinat mbrojnë në çdo moshë”, sipas institucioneve, pasqyron nevojën që imunizimi të shihet si një proces i vazhdueshëm gjatë gjithë jetës, nga lindja deri në moshën e rritur.
Në njoftim theksohet se vaksinimi mbetet një nga ndërhyrjet më të suksesshme dhe me kosto-efektive në shëndetin publik, duke parandaluar sëmundje të rënda, komplikime dhe vdekje, si dhe duke kontribuar në krijimin e imunitetit kolektiv në komunitet.
Sipas të dhënave zyrtare, gjatë vitit të fundit është shënuar një përmirësim i dukshëm në mbulueshmërinë me vaksinimin bazë për fëmijët e moshës 0–1 vjeç.
“Gjatë vitit të fundit, programi i vaksinimit në Kosovë ka shënuar përmirësim në vaksinimin bazë (0–1 vjeç), me rritje të dukshme krahasuar me vitet paraprake. Ky progres dëshmon besimin e rritur të qytetarëve në sistemin shëndetësor dhe përkushtimin e institucioneve në ofrimin e shërbimeve të sigurta dhe të qasshme të imunizimit”, thuhet në komunikatën e përbashkët.
Ministri i Shëndetësisë, Arben Vitia, e ka cilësuar vaksinimin si një investim strategjik për të ardhmen e vendit, duke theksuar se institucionet do të vazhdojnë të punojnë për forcimin e sistemit të imunizimit.
“Vaksinimi është një investim i drejtpërdrejtë në shëndetin e qytetarëve dhe në të ardhmen e vendit tonë. Ne do të vazhdojmë të forcojmë sistemin e imunizimit, duke siguruar që çdo qytetar të ketë qasje të barabartë dhe të sigurt në vaksina cilësore”, ka deklaruar Vitia.
Autoritetet shëndetësore bëjnë të ditur se nga viti 2024, programi i imunizimit në Kosovë ka shënuar përparime të rëndësishme, përfshirë integrimin e tri vaksinave të reja në kalendarin e rregullt të vaksinimit.
Një zhvillim i rëndësishëm është edhe zgjerimi i vaksinimit kundër HPV-së (Human Papilloma Virus), i cili tashmë përfshin edhe djemtë, si dhe rritja e kufirit të moshës për vaksinim deri në 26 vjeç.
“Një zhvillim i veçantë është zgjerimi i vaksinimit kundër HPV-së, tashmë edhe për djemtë si dhe rritja e kufirit të moshës për vaksinim deri në 26 vjeç, në përputhje me evidencën shkencore dhe praktikat ndërkombëtare, me qëllim uljen e rrezikut nga kanceret e lidhura me HPV”, thuhet në njoftim.
Megjithatë, pavarësisht progresit, institucionet paralajmërojnë për sfida të vazhdueshme, veçanërisht rënien e mbulueshmërisë me vaksinën MMR (fruthi, shytat dhe rubeola), e cila mund të rrisë rrezikun për shpërthime të sëmundjeve të parandalueshme.
Në këtë drejtim, Drejtoresha ekzekutive e IKShPK-së, Ardita Baraku, u ka bërë thirrje qytetarëve për mobilizim dhe përgjegjësi të përbashkët.
“Çdo dozë e papërfunduar rrit rrezikun për rikthimin e sëmundjeve që mund të parandalohen me vaksinë, ndaj është shumë e rëndësishme që prindërit dhe komuniteti të bazohen në informacione të sakta dhe të sigurojnë vaksinimin në kohën e duhur të fëmijëve të tyre. Prandaj, i ftojmë prindërit, të rinjtë dhe të gjithë qytetarët që të informohen nga burime të besueshme dhe të shfrytëzojnë shërbimet e vaksinimit”, ka theksuar Baraku.
Institucionet kanë shprehur gjithashtu mirënjohje për mbështetjen e vazhdueshme të partnerëve ndërkombëtarë.
Shefja e Zyrës së UNICEF-it në Kosovë, Veronika Vashchenko, ka theksuar rëndësinë e arritjes së fëmijëve të pavaksinuar.
“Për të mbyllur boshllëqet me vaksinim, është thelbësore të arrihen fëmijët e pavaksinuar dhe ata me vaksinim jo të plotë. Së bashku me IKShPK-në, UNICEF-i është duke zbatuar një fushatë të vaksinimit plotësues për të vaksinuar 1,000 fëmijë të cilët mbeten të cenueshëm ndaj sëmundjeve ngjitëse”, ka deklaruar ajo.
Ndërkohë, përfaqësuesja e Organizatës Botërore të Shëndetësisë në Kosovë, Isme Humolli, ka nënvizuar ndikimin global të vaksinimit ndër vite.
“Gjatë 50 viteve të fundit, falë vaksinimit, miliona jetë janë shpëtuar duke ndikuar drejtpërdrejt në rënie prej 40% të vdekshmërisë së foshnjeve në mbarë botën. Ky progres i jashtëzakonshëm dëshmon fuqinë e vaksinimit për të mbrojtur jetë dhe për të ndërtuar shoqëri më të shëndetshme”, është shprehur ajo.
Në përfundim, institucionet bëjnë thirrje për angazhim të përbashkët të qytetarëve dhe profesionistëve shëndetësorë, duke theksuar se imunizimi mbetet një përgjegjësi kolektive dhe një investim i domosdoshëm për një të ardhme më të sigurt.
“Vaksinat shpëtojnë jetë. Imunizimi është përgjegjësi e përbashkët. Së bashku për një të ardhme më të shëndetshme”, thuhet në fund të njoftimit./teve1.info/
