Me moton “Personat e moshuar nxisin veprimin lokal dhe global: ASPIRATAT, MIRËQENIA DHE TË DREJTAT TONA”, sot shënohet dita ndërkombëtare e personave të moshuar.
Instituti Kombëtar i Shëndetësisë Publike mbajti një takim me persona të moshuar ku u diskutua për rëndësinë e personave të moshuar në shoqëri. Me mesazhe si “ Energjia e të rinjve dhe përvoja e të moshuarve krijojnë ekuilibrin e së ardhmes” dhe “Të kujdesemi për ata qe dikur kujdeseshin për ne është mirënjohje dhe nder”, përfaqësues të IKSHPK-së, Ministrisë së Shëndetësisë dhe organizata jo-qeveritare treguan rëndësinë e kujdesit të duhur për të moshuarit.
Ardita Baraku, drejtoreshë e IKSHPK u shpreh se angazhimi social është kyç për ndikimin pozitiv në jetën e personave të moshuar.
“Të nderuar, ju persona të moshuar, kjo është dita juaj kur ne reflektojmë mbi kontributin tuaj, jemi mirënjohës për kontributin tuaj dhe e përsërisim përkushtimin dhe angazhimin tonë për jetë të mirë për këtë brez të shoqërisë. Moshimi i popullsisë është një trend në nivel global dhe llogaritet që deri në vitin 2050 në nivel botëror popullata mbi 65 vjeçe do të përbëj 17% të popullsisë dhe këtij trendi nuk i shmanget as Kosova sepse edhe tek ne është konstatuar numër më i madh i të moshuarve në regjistrimin e fundit të popullsisë në krahasim me regjistrimin e kaluar. Kjo do të thotë se duhet bërë angazhime shtesë për kujdes shëndetësor të përshtatur për nevojat e të moshuarve, për mbrojtje sociale të përshtatur për ta, për ndërmjetësim, angazhim dhe bashkëpunim ndërmjet brezash në mënyrë që t’i ndihmojmë njëri-tjetrit ashtu si mundemi dhe mbi të gjitha mbindërtimin e politikave që do të ndikojnë në shëndetin publik, në një mirëqenie dhe një jetëgjatësi të të moshuarve”, tha ajo.
Shaban Osmanaj, përfaqësues nga Ministria e Shëndetësisë tha se Ministria e Shëndetësisë së bashku me Qeverinë e Kosovës mbeten të dedikuar në garantimin e kujdesit cilësor për qytetarët e moshuar.
“Sot është dita për të shprehur respektin dhe mirënjohjen tonë për ata që kanë dhënë shumë për këtë vend, por edhe dita për të marrë hapa të guximshëm për të siguruar që të drejtat dhe aspiratat e tyre të mos mbesin vetëm fjalë, por të kthehen në realitet të prekshëm. Në ditën ndërkombëtare të personave të moshuar, i bashkohemi gjithë botës për të vlerësuar rolin e pazëvendësueshëm të tyre në shoqërinë tonë, pra siç e thashë, sipas të dhënave të vitit 2024, 11% e popullsisë janë mbi moshën 65 vjeçare, një rritje dukshëm me vitin 2011, që na obligon të forcojmë politikat dhe kujdesin shoqëror dhe social ndaj tyre. Motoja e këtij viti na kujton se të moshuarit nuk janë vetëm kujdestarë të të kaluarës, por edhe udhërrëfyes të së ardhmes. Qeveria dhe Ministria e Shëndetësisë mbeten të përkushtuar të garantojnë kujdes cilësor, dinjitet dhe jetë aktive për çdo të moshuar në Kosovë, andaj në emër të Ministrisë së Shëndetësisë, më lejoni të uroj gëzuar këtë ditë”, tha Osmanaj.
Kurse Visare Mujko Nimani, shefe e zyrës së UNFPA, tha se të drejtat e personave të moshuar, e sidomos atyre me aftësi të kufizuara duhet mbrojtur përmes zhvillimit dhe forcimit të ligjeve.
“Kjo ditë na kujton se moshimi është një proces i përbashkët. Të gjithë ne jemi duke shkuar drejtë saj dhe secili ka të drejtë të jetojë me dinjitet, shëndet dhe mundësi të barabarta. Motoja e këtij viti na fton të reflektojmë për rolin e të moshuarve si forca aktive e shoqërisë sonë. Ata nuk janë vetëm përfitues të shërbimeve por bartës të përvojës, kujdestarë të traditës dhe mbështetje të familjeve tona. Megjithatë, duhet të theksojmë veçanërisht gjendjen e personave të moshuar me aftësi të kufizuara, të cilët përballen me barriera edhe më të mëdha në qasje në shërbime shëndetësore, diskriminim të dyfishtë dhe shpesh mungesë të mbështetjes së duhur. Këto pengesa nuk mund t’i injorojmë më, shëndeti publik ka rol vendimtar, shërbime parandaluese, vaksinimi dhe kujdesi afatgjatë duhet të jenë të qasshme për të gjithë kudo që jetojnë. Prandaj ne duhet të zhvillojmë dhe forcojmë shërbime me kujdes të specializuar për të moshuarit me theks në parandalim, rehabilitim dhe kujdes afatgjatë”, tha ajo, shkruan KP.
Dita e të moshuarve mbahet tradicionalisht tash e 13 vite.
