Me rastin e 15 Majit, Ditës Ndërkombëtare të Familjes, Ministria për Punë, Familje dhe Vlerat e Luftës Çlirimtare organizoi një aktivitet përrmbyllës me pjesëmarrjen e familjeve, fëmijëve, institucioneve partnere dhe organizatave joqeveritare, ku u theksua rëndësia e familjes dhe mbështetja institucionale për mirëqenien sociale në Kosovë.
Ministri për Punë, Familje dhe Vlerat e Luftës Çlirimtare, Andin Hoti, në fjalën e tij tha se familja mbetet themeli i shoqërisë dhe vendi ku ndërtohen vlerat më të rëndësishme njerëzore.
“Sot është një ditë gëzimi, bashkimi dhe mirënjohjeje për njerëzit më të rëndësishëm të jetës tonë — familjen. Familja është vendi ku marrim dashurinë e parë, mbështetjen e parë dhe vlerat që na përcjellin gjatë gjithë jetës sonë. Pikërisht për këtë, sot kemi zgjedhur të jemi së bashku në një atmosferë festive me fëmijë, prindër, gjyshër, të rinj, për të vlerësuar rëndësinë e familjes në shoqërinë tonë. Sllogani i këtij viti është “Shteti fillon me familjen”, sepse te familja fillon edukimi, solidariteti, respekti dhe kujdesi për njëri-tjetrin. Si ministër i Punës, Familjes dhe Vlerave të Luftës Çlirimtare, mbetem i përkushtuar që familja të jetë gjithmonë në qendër të politikave tona dhe çdo familje në Republikën e Kosovës të ndihet e mbështetur dhe e vlerësuar.”, u shpreh Hoti.
Në këtë aktivitet morën pjesë edhe organizatat partnere, përfshirë UNICEF-in, OFAP-in (Organizatën për Fëmijët pa Kujdes Prindëror), organizata SOS fshati dhe Terre des Hommes, të cilat vunë në dukje rëndësinë e familjes dhe mbështetjes për fëmijët.
Drejtoresha ekzekutive e OFAP-it, Ibadete Krasniqi, tha se organizata që ajo përfaqëson prej më shumë se 20 vjetësh bashkëpunon me nivelin qendror dhe komunal për zhvillimin e strehimit familjar në Kosovë.
“Familja është vendi ku fillon gjithçka: dashuria e parë, ndjenja e sigurisë, mbështetja në momentet më të vështira dhe forca për të vazhduar përpara. Është strehë emocionale, ku çdo njeri duhet të ndihet i pranuar, i mbrojtur dhe i dashur. Por, sot kjo ditë na kujton edhe përgjegjësinë që kemi si shoqëri ndaj fëmijëve që nuk kanë pasur mundësi të rriten pranë familjeve të tyre biologjike. Për këta fëmijë strehimi familjar nuk është vetëm një shërbim social, është një shans i dytë për jetë, për përkatësi dhe për shpresë. Çdo fëmijë meriton të zgjohet në një ambient ku dëgjon fjalë të mira, ku ndien përqafimin dhe kujdesin e prindërve dhe ku mëson se sa është e rëndësishme që të rritet në një ambient të ngrohtë familjar“, tha Krasniqi.
Në kuadër të aktivitetit, ministria nderoi me mirënjohje gazetarë dhe përfaqësues të mediave për kontributin e tyre në raportimin e çështjeve sociale dhe rolin si urë lidhëse ndërmjet institucioneve dhe qytetarëve.
Aktiviteti përfundoi me valle, muzikë dhe aktivitete festive për fëmijë dhe familje, në atmosferë bashkimi dhe solidariteti për shënimin e Ditës Ndërkombëtare të Familjes.
