Qyteti i Prishtinës përkundër nismave për t’ia lehtësuar lëvizjen personave me aftësi të kufizuara, mbetet larg ofrimit të kushteve, thonë vet personat me shkop të bardhë.
Ata për nder të javës ndërkombëtare “Njeriu me Shkop të Bardhë”, sot marshuan nga Qendra Studentore deri te ndërtesa e Qeverisë së Kosovës.
Këtij marshi iu bashkua edhe kryetari i Komunës së Prishtinës, Përparim Rama, i cili tha se komuna që drejton ka marrë disa hapa duke filluar nga komuna për pllakat taktile për qasje më të lehtë të verbërve.
Gjithashtu, ai tha se me ridizajnimin e sheshit të kryeqytetit, do të lidhet edhe pjesa me shtresa taktile për ata persona.
“Komuna e Prishtinës ka marrë iniciativa të ndryshme për të transformuar ndërtesat publike, duke filluar prej ndërtesave të komunës, komuna e vjetër dhe komuna e re, duke krijuar pllaka taktile të cilat iu ndihmojnë komitetit të verbërve, për të pasur qasje sa më të mirë, më të lehtë, më të shpejtë dhe më të kuptueshme nëpër ndërtesa e Komunës së Prishtinës”, tha Rama.
Kurse, nënkryetari i organizatës You Can Do, Betim Bregovina, tha se ky marsh synon vetëdijesimin për gjithpërfshirjen e këtyre njerëzve në shoqëri. Ai theksoi se nuk ka kushte të mjaftueshme dhe bëri thirrje që të dalin dhe të mos kenë turp për ata që janë.
“Ky marsh synon që të filloj vetëdijesimin e udhëheqësve lokal dhe qendror në Kosovë por edhe masës qytetare për njohjen dhe pranimin e shenjave simboleve për të verbëritë, në këtë rast shkopin e bardhë. Nuk ka mjaftueshëm kushte por si çdo gjë në Kosovë, si vetë Kosova që është në ndërtim e sipër edhe tek ne ka nisma fillestare të cilat sigurisht nuk janë të mjaftueshëm por janë sinjalizuese se në të ardhmen do të bëhet diçka”, tha ai.
Ndërkaq e revoltuar doli të jetë drejtoresha e komitetit të grave të verbërve, Bajrumshahe Jetullahu, ku në fund të marshit i drejtua kryetarit Rama, duke i thënë se komiteti i të verbërve nuk është duke u përkrahur fare. Ajo tha se kanë pasur premtime por nuk janë realizua asnjëherë.
“Kam pasur shumë shpresë të madhe tek ju, halli i komitetit i të verbërve është zero i përkrahur qoftë nga qeveria, por përsëri Komuna e Prishtinës anashkalohet, një 15% mund të them në krahasim me komunat e tjera, mirëpo as qeveria e as komuna me marrë globalisht”, u shpreh kjo qytetare.
Qeveria e Kosovës krijoi strategjinë kombëtare për të drejtat e personave me nevoja të veçanta për periudhën nga viti 2013 deri më 2023. Ky dokument ka për qëllim të sigurojë të drejta të barabarta të njeriut për të gjithë, pa diskriminim./KP/