Në Kosovë është shënuar Dita Botërore e Inovacionit me një aktivitet që ka bashkuar ndërmarrës, inovatorë dhe partnerë të ndryshëm, ku mori pjesë edhe ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila.
Në fjalën e saj, Kusari-Lila ka theksuar se Kosova ka potencial të madh zhvillimi, duke u mbështetur në të rinj të talentuar, ide kreative dhe energji për progres.
Sipas saj, sfida kryesore mbetet lidhja e këtyre ideve me mundësi konkrete në treg.
Ajo është shprehur se inovacioni nuk kufizohet vetëm në teknologji, por përfaqëson një mjet të rëndësishëm për krijimin e vendeve të punës, rritjen ekonomike dhe forcimin e pozitës së Kosovës në arenën ndërkombëtare.
Ministrja ka përmendur gjithashtu ligjin e ri për inovacion dhe ndërmarrësi si dhe krijimin e Fondit për Inovacion, të cilat sipas saj po vendosin bazat për shndërrimin e ideve në biznese dhe suksese konkrete.
Në këtë proces u vlerësua edhe roli i diasporës, partnerëve ndërkombëtarë si dhe bashkëpunimi ndërmjet institucioneve, bizneseve dhe akademisë, të cilat u cilësuan si elemente kyçe për ndërtimin e një ekosistemi funksional të inovacionit.
Në aktivitet mori pjesë edhe kryeministri Albin Kurti, i cili ndau vizionin për rëndësinë e inovacionit në zhvillimin ekonomik të vendit.
Kusari-Lila është shprehur optimiste për të ardhmen, duke theksuar se Kosova ka potencialin e nevojshëm dhe se po ndërtohen mekanizmat që mundësojnë shfrytëzimin e tij./teve1.info/
