Ka ndërruar jetë në moshën 64-vjeçare Shemsi Krasniqi, i njohur për publikun si Shemi, solisti i grupit të njohur rock-folk “Ilirët”.
Burime nga Emergjenca kanë bërë të ditur se Shemi është gjetur pa shenja jete sot rreth orës 15:00, ndërsa vdekja e tij dyshohet të ketë ardhur si pasojë e një sulmi në zemër.
“Sot rreth orës 15:00, një person është gjetur pa shenja jete. Dyshohet se vdekja ka ardhur si pasojë e një sulmi në zemër”, kanë thënë burime nga Emergjenca.
Shemsi Krasniqi ishte një nga figurat më të njohura të muzikës shqiptare dhe një prej zërave më ikonikë të skenës muzikore vendore. Ai ishte pjesë e grupit “Ilirët”, i cili u formua në vitin 1981, vit në të cilin grupi publikoi edhe këngën e parë me titull “Merita”.
Shemi mbetet i paharruar për kontributin e tij në këngën tashmë simbol kombëtar “Xhamadani vija vija”, këngë së cilës ai i dha shpirt dhe identitet artistik.
Grupi “Ilirët” u shqua ndër vite edhe me këngë të tjera të suksesshme. Në vitin 2012, ata publikuan albumin “Moj Kosovë”, ndërsa kënga “Qaj Mirvete” u bë një nga më të dëgjuarat nga publiku.
Po ashtu, Shemi njihet edhe për interpretimin e këngës “Rini Thuaja Këngës”, me të cilën grupi “Ilirët” mori pjesë në Netët e Klipit Shqiptar 13, në vitin 2014.
Vdekja e Shemsi Krasniqit ka prekur thellë familjen, miqtë dhe adhuruesit e muzikës shqiptare, duke lënë pas një trashëgimi të pasur artistike.
