Një rrëshqitje e papritur e tokës i la banorët të bllokuar.
Pas reshjeve të dendura të ditëve të fundit, ura që lidh fshatin Smallushë të Lipjanit me zonat përreth u dëmtua rëndë dhe më pas u shemb plotësisht.
Banorët tregojnë se dëmtimi kishte nisur më herët, por rrjedha e madhe e lumit e përkeqësoi situatën të shtunën.
“Është ardhë një nivel i ujit që rrallëherë vjen në Smallushë, e ka dëmtu këtë urën këtu ku ja ka marr atë materialin, i cili s’ka qenë aq, pasi që me vetëfinancim e kemi ndërtu na, edhe fatkeqësisht ka ra, na jemi mbetur të bllokum”, deklaroi banori Mehdi Krasniqi.
“Unë dje e kom vrejt, në atë pjesën atje pak që është qarë por ja kom lënë pjesës së rrugës, edhe sot në mëngjes më kanë thirrë, më kanë thanë që ura ka rrëshqit, kur dola nuk ke qeshtu, u kon ma pak edhe ton kohën tu nejt qetu masanej u ra poshtë”, deklaroi banori tjetër Murat Krasniqi.
Në vendngjarje, gjatë ditës dolën edhe zyrtarët komunalë për të parë nga afër gjendjen.
Nënkryetari i komunës, Diamant Bytyçi thotë që pasi të qetësohet situata, do të fillojnë me rindërtimin e urës së re.
“Jemi këtu së bashku me banorët me pa situatën qysh është. Ne si Komunë e kemi bo shtabin emergjent, jemi në teren prej mëngjesit, në të gjitha fshatrat ku gjendja është e vështirësuar prej vërshimeve. Edhe fshati Smallushë bashkë me disa fshatra tjerë janë në gjendje të rënduar. Ura aktualisht është e dëmtume edhe për shkak të rrjedhjes së madhe të lumit. Menjëherë nuk mund të intervenojmë, presim pak deri sa të qetësohet lumi dhe vërshimet dhe pastaj do të marrim masa dhe do ta ndërtojmë urën e re”, deklaroi ai.
Dëmtime të tilla nga reshjet ka pasur edhe në vende të tjera të Kosovës.
Kronikë e realizuar nga gazetarja Jona Kelmendi.
