Ekipet e shpëtimit në qytetin gjerman Görlitz kanë vijuar kërkimet për tre persona të zhdukur, pasi një ndërtesë u shemb të hënën në mbrëmje pranë kufirit me Poloninë.
Sipas policisë, dyshohet se shembja mund të jetë shkaktuar nga një shpërthim gazi.
Për shkak të rrezikut nga rrjedhjet, punonjësit e emergjencës po punojnë me kujdes gjatë kontrollit të rrënojave dhe sigurimit të zonës.
Fillimisht u mendua se deri në pesë persona mund të kishin mbetur nën rrënoja, por më vonë u konfirmua se numri i të zhdukurve është tre.
Kërkimet me qen nuhatës nuk dhanë rezultat, ndaj ekipet kanë nisur edhe heqjen e rrënojave me makineri të rënda dhe mjete dore.
Një dëshmitar, familjar i dy prej personave të zhdukur, tha se kishte dëgjuar një shpërthim të fortë ndërsa ndodhej pranë një supermarketi dhe, kur është kthyer, ka parë ndërtesën të shembur.
Ndërtesa e dëmtuar ishte një godinë e vjetër në stilin vilhelminian dhe përdorej si apartamente me qira për banim dhe turistë.
Görlitz, një qytet me rreth 57 mijë banorë në lindje të Gjermanisë, njihet edhe për qendrën e tij historike që shpesh përdoret si vend xhirimi për filma ndërkombëtarë.
