Shehu në Tëvë1 deklaroi se fëmijët e moshave të reja janë shumë të talentuar dhe kanë afinitet të madh për teknologji.
“Fëmijët që kanë qenë pjesë e aktiviteteve që i kemi organizuar sot gjatë ditës, e kemi parë që kemi një talent shumë të madh, posaçërisht të moshave të reja të cilët kanë afinitet për teknologji dhe janë të gatshëm për të punuar me dorë dhe t’i prodhojnë vetë gjërat. Unë besoj që jemi shumë afër, nëse jo në nivel të njëjtë me rininë e gjithë Bashkimit Evropian”, tha ai.
I ftuar në emisionin “Ditari” në Tëvë1 Shehu foli për aktivitete që ka organizuar Shtëpia e Evropës në Kosovë, sot me rastin e 9 majit, Ditës së Evropës.
“Tema kryesore e shënimit të kësaj dite këtë vit është viti i të rinjve pasi Bashkimi Evropian e ka cilësuar vitin 2022 si vit i të rinjëve. Prandaj edhe aktivitete që i kemi përfshirë në këtë ditë kanë qenë rreth kësaj teme, rreth të rinjve dhe fuqizimin e tyre, të ardhmen e gjelbër dhe transformimin digjital. Fillimisht dje kemi filluar me ngjyrosjen e muralit tek hapësirat e rrethit në Prishtinë, kemi mbyllur rrugën “Xhorxh Bush” dhe “Garibaldi” ku qytetarët kanë mundur të lëvizin lirshëm me qëllim që të promovojnë lëvizjen e lirë në atë ambient pa automjet, ata kanë pasur mundësin të lëvizin me trotinet dhe me biçikleta. Pastaj për fëmijët dhe të rinj të cilët kanë mundë të përcjellin për disa orë work shopin dhe t’i krijojnë produktet e energjisë dhe të shohin si të prodhohet energjia e ripërtërishme dhe e pastër”, theksoi ai.
Shehu tutje potencoi se edhe Bashkimi Evropian është ndarë shumë i kënaqur me zhvillimin e aktiviteteve që janë realizuar sot në Kosovë për shënimin e kësaj dite.
“Fakti që ne e shënojmë ditën e Evropës tregon që ne jemi të prirë për t’u bërë pjesë e BE-së dhe për t’i marrë vlerat që Bashkimi Evropian i ka dhe për t’i promovuar ato. Është një keqkuptim që Dita e Evropës merret si festim e që në fakt nuk është festim por është një shënim i konceptit të paqes dhe bashkimit që prej se është krijuar unioni Evropian”, tha ai tutje në Tëvë1.