Presidentja e re e Kosovës, Justina Shiroka-Pula, duhet ta shndërrojë përfundimin e krizës institucionale në një mundësi për forcimin e shtetit, rikthimin e partneritetit strategjik me Shtetet e Bashkuara të Amerikës dhe përshpejtimin e integrimit euroatlantik.
Kështu vlerëson Arianit Shehu, drejtor ekzekutiv i Qendrës Amerikane për Luftimin e Ekstremizmit dhe Terrorizmit (ACCET), në një shkrim autorial, ku paraqet 10 prioritete që, sipas tij, duhet të jenë në qendër të mandatit të presidentes së re.
Në analizën e titulluar “Kosova ka nevojë për rezultate, jo për një tjetër kapitull pritjesh: 10 prioritetet për presidenten Justina Shiroka-Pula”, Shehu thekson se funksionalizimi i institucioneve pas një periudhe të gjatë të ngërçit politik është zhvillim pozitiv, por nuk përbën sukses në vetvete, transmeton KosovaPress.
Ai paralajmëron se optimizmi i qytetarëve mund të zbehet shpejt nëse institucionet nuk prodhojnë rezultate konkrete në ekonomi, siguri dhe integrim ndërkombëtar.
“Funksionalizimi i institucioneve nuk është sukses në vetvete, por vetëm parakushti për suksesin e vërtetë: përmirësimin e jetës së qytetarëve, forcimin e shtetit dhe përshpejtimin e integrimit euroatlantik”, shkruan Shehu.
Sipas tij, Kosova vazhdon të mbetet prapa vendeve të rajonit në zhvillimin ekonomik dhe proceset integruese.
Duke iu referuar vlerësimeve të Fondit Monetar Ndërkombëtar për vitin 2026, ai thotë se produkti i brendshëm bruto për frymë i Kosovës, i matur sipas fuqisë blerëse, përfaqëson vetëm rreth 27 për qind të mesatares së Bashkimit Evropian.
Shehu vlerëson se presidentja e re, megjithëse nuk drejton Qeverinë, mund të ndikojë në orientimin strategjik të vendit përmes kompetencave kushtetuese dhe ndërtimit të konsensusit politik.
