Shefi i Kombeve të Bashkuara për të Drejtat e Njeriut, Volker Türk, i ka bërë thirrje Izraelit të ndalojë menjëherë ofensivën tokësore në qytetin e Gazës, duke theksuar nevojën urgjente që forcat izraelite të “ndalojnë masakrën” në një zonë tashmë të përballur me uri ekstreme.
“Mund të mendoj vetëm se çfarë do të thotë për gratë, për fëmijët e kequshqyer, për njerëzit me aftësi të kufizuara, nëse ata sulmohen përsëri në këtë mënyrë”, u tha Türk gazetarëve sot në Gjenevë, sipas agjencisë së lajmeve Reuters.
“I bëj thirrje Izraelit të ndalojë shkatërrimin e pamëshirshëm të Gazës.”
Komentet e tij erdhën pasi një Komision Hetimor i OKB-së arriti në përfundimin se Izraeli ka kryer gjenocid në Gaza dhe se zyrtarët izraelitë, përfshirë kryeministrin e vendit, kanë nxitur akte gjenocidi.
