Kreu i aleancës ushtarake të NATOS-s ka thënë të hënën, se anëtarët e aleancës duhet të rrisin mbrojtjen e tyre ajrore dhe raketore me 400% për t’iu kundërvënë kërcënimit nga Rusia, duke paralajmëruar se Moska mund të jetë gati t’i sulmojë brenda pesë vjetësh.
Sekretari i Përgjithshëm Mark Rutte tha gjatë një vizite në Londër se pret që 32 anëtarët e NATO-s të bien dakord për një rritje të madhe të shpenzimeve ushtarake në një samit në Holandë këtë muaj.
Duke folur në qendrën e mendimit shkencor Chatham House, Rutte tha se Rusia po e tejkalon NATO-n shumë më shumë në prodhimin e municioneve dhe se aleanca duhet të bëjë një “kërcim kuantik” në mbrojtjen kolektive, raporton AP.
“Të menduarit sipas dëshirave nuk do të na mbajë të sigurt”, tha Rutte. “Nuk mund ta largojmë rrezikun me ëndrra. Shpresa nuk është strategji. Pra, NATO duhet të bëhet një aleancë më e fortë, më e drejtë dhe më vdekjeprurëse”.
Ashtu si anëtarët e tjerë të NATO-s, Mbretëria e Bashkuar ka rivlerësuar shpenzimet e saj të mbrojtjes që nga pushtimi i plotë i Ukrainës nga Rusia në shkurt 2022.
Kryeministri britanik, Keir Starmer është zotuar të rrisë shpenzimet britanike të mbrojtjes në 2.5% të produktit të brendshëm bruto deri në vitin 2027 dhe në 3% deri në vitin 2034.
Rutte ka propozuar një objektiv prej 3.5% të prodhimit ekonomik për shpenzimet ushtarake dhe 1.5% tjetër për “shpenzimet që lidhen me mbrojtjen”, siç janë rrugët, urat, aeroportet dhe portet detare.
Ai tha javën e kaluar se është i bindur se aleanca do të bjerë dakord për objektivin në samitin e saj në Hagë më 24-25 qershor.
Për momentin, 22 nga 32 vendet anëtare e përmbushin ose e tejkalojnë objektivin aktual prej 2% të NATO-s.
