Sekretari i Përgjithshëm i NATO-s, Mark Rutte, gjatë një samiti në Hagë, bëri një krahasim interesant për rolin e presidentit amerikan, Donald Trump në konfliktin mes Iranit dhe Izraelit, duke e përshkruar atë si një “baba” që ndërhyn në një përleshje në oborrin e shkollës.
Komentet e Rutte erdhën pasi Trump kishte krahasuar përplasjet mes Izraelit dhe Iranit me një grindje mes fëmijëve.
“Ata janë zënë shumë, si dy fëmijë në oborr shkolle. Zihen me tërbim dhe nuk mund t’i ndalosh menjëherë. Më mirë lëri të zihen për dy-tri minuta, pastaj është më e lehtë t’i ndash,” tha Trump në një konferencë për shtyp.
Rutte, duke qeshur, shtoi: “Dhe pastaj babait ndonjëherë i duhet të përdorë gjuhë të fortë që t’i ndalojë.”
Të martën, pas arritjes së një armëpushimi midis Iranit dhe Izraelit, Trump komentoi se palët kishin luftuar “kaq gjatë dhe aq ashpër, sa që tashmë nuk e dinë as vetë se çfarë po bëjnë”, shkruan Reuters.
Kur një gazetar e pyeti nëse po i bënte shumë komplimente Trumpit, Rutte u përgjigj: “Jo, nuk mendoj. Është çështje shijeje.”
Ai e cilësoi Trumpin si “një mik të mirë” prej më shumë se dhjetë vitesh dhe vlerësoi ndikimin e tij në forcimin e NATO-s, duke theksuar se ishte pikërisht Trump ai që më në fund i kishte bindur vendet evropiane të rrisnin shpenzimet për mbrojtjen.
“Pra, a nuk meriton disa lavdërime?” përfundoi Rutte.
