Anëtarët e aleancës perëndimore NATO duhet të jenë të përgatitur për një kërcënim të mundshëm ushtarak nga Rusia brenda katër viteve të ardhshme, paralajmëroi Gjenerali Carsten Breuer, shefi i mbrojtjes së Gjermanisë.
Duke folur për BBC-në në margjinat e Dialogut Shangri-La në Singapor, një samit ndërkombëtar për çështjet e mbrojtjes i organizuar nga Instituti Ndërkombëtar për Studime Strategjike (IISS), Gjenerali Breuer theksoi se Rusia po rrit ndjeshëm kapacitetet e saj ushtarake dhe prodhon aktualisht rreth 1,500 tanke kryesore beteje në vit.
Sipas tij, një pjesë e këtyre tankeve po shkojnë në frontin në Ukrainë, ndërsa të tjerat po magazinohen ose po përdoren për ndërtimin e strukturave të reja ushtarake në kufijtë me Perëndimin.
Ai shtoi gjithashtu se Rusia ka prodhuar rreth katër milionë fishekë artilerie 152 mm gjatë vitit 2024, sasi që nuk është përdorur tërësisht në Ukrainë.
Këto të dhëna, sipas gjeneralit, vijnë nga analiza të shërbimeve të inteligjencës gjermane dhe partnere të NATO-s dhe tregojnë për një përgatitje të mundshme për një ofensivë ndaj shteteve baltike deri në vitin 2029 – ose më herët.
“Nëse më pyetni nëse kjo është një garanci që nuk ndodh para vitit 2029, do të thosha jo. Prandaj, duhet të jemi të përgatitur të luftojmë që sot,” theksoi ai.
Një nga zonat më të ndjeshme që përmendi gjenerali Breuer ishte i ashtuquajturi “Hendeku Suwalki” – një korridor tokësor i ngushtë mes Lituanisë dhe Polonisë që ndan enklavën ruse të Kaliningradit nga Bjellorusia. Kjo zonë është cilësuar prej kohësh si një pikë kritike strategjike dhe e cenueshme për sigurinë e NATO-s.
Gjenerali Breuer vuri në dukje kontrastin mes perceptimeve të kërcënimit nga shtete të ndryshme anëtare të NATO-s. Ai solli shembullin e Estonisë, ku qytetarët dhe autoritetet “ndjejnë nxehtësinë, shohin flakët dhe nuhasin tymin” nga kërcënimi rus, ndërkohë që në Gjermani “shihen vetëm pak re tymi në horizont”.
Ai gjithashtu theksoi nevojën që NATO të ruajë unitetin dhe të qëndrojë e bashkuar përballë kërcënimeve të jashtme, pavarësisht pikëpamjeve të ndryshme politike brenda aleancës.
Ai ngriti shqetësime për një sërë incidentesh të fundit që sipas tij janë pjesë e përpjekjeve të Rusisë për të testuar qëndrueshmërinë e infrastrukturës dhe mbrojtjes perëndimore – përfshirë sulmet ndaj kabllove nënujore në Detin Baltik, ndërhyrjet kibernetike në sisteme të transportit publik dhe praninë e dronëve të paidentifikuar mbi objekte strategjike në Gjermani.
Në këtë kontekst, Gjenerali Breuer bëri thirrje për një rritje të ndjeshme të investimeve në mbrojtje nga ana e vendeve anëtare. “Ne duhet të rrisim kapacitetet tona ushtarake dhe të jemi të gatshëm të përballemi me kërcënime reale. Kjo nuk është vetëm një çështje ushtarake, por edhe një angazhim politik dhe shoqëror,” theksoi ai.
Komentet e tij vijnë disa javë përpara një samiti të rëndësishëm të NATO-s në Hagë, ku liderët e vendeve anëtare pritet të diskutojnë, ndër të tjera, për buxhetet e mbrojtjes dhe për strategjitë afatgjata të sigurisë.
Qëndrimet e fundit të Gjermanisë pasqyrojnë një ndryshim të madh në politikën e saj të mbrojtjes, krahasuar me dekadat e mëparshme të shkurtimit të buxheteve ushtarake.
