Presidenti amerikan, Donald Trump ka thënë të enjten se kishte siguruar akses të plotë dhe të përhershëm të SHBA-së në Grenlandë në një marrëveshje me NATO-n.
Lajmi për një marrëveshje kornizë erdhi ndërsa Trump u tërhoq nga kërcënimet për tarifa dhe përjashtoi marrjen e Grenlandës me forcë.
Por detajet e çdo marrëveshjeje ishin të paqarta dhe Danimarka këmbënguli se sovraniteti i saj mbi ishullin nuk ishte në diskutim.
“Po negociohet vërtet tani, detajet e saj. Por në thelb është akses i plotë. Nuk ka fund, nuk ka afat kohor”, ka thënë Trump për Fox Business Network në një intervistë nga Davos, ku po merr pjesë në Forumin Ekonomik Botëror.
Kurse, Shefi i Nato-së, Mark Rutte i tha Reuters në një intervistë në Davos se tani u takon komandantëve të lartë të NATO-s të punojnë mbi detajet e kërkesave shtesë të sigurisë.
“Nuk kam dyshim se mund ta bëjmë këtë mjaft shpejt. Sigurisht që shpresoj për vitin 2026, shpresoj edhe në fillim të vitit 2026”, tha ai.
Rutte tha se shfrytëzimi i mineraleve nuk u diskutua gjatë takimit të tij me Trump, duke shtuar se negociatat specifike për ishullin Arktik do të vazhdonin midis Shteteve të Bashkuara, Danimarkës dhe vetë Grenlandës.
Një marrëveshje e vitit 1951 midis Shteteve të Bashkuara dhe Danimarkës përcaktoi të drejtën e SHBA-së për të ndërtuar baza ushtarake në Grenlandë dhe për të lëvizur lirisht në territorin e Groenlandës.
Kjo është ende e vërtetë për sa kohë që Danimarka dhe Grenlanda janë të informuara për veprimet e saj.
