Njohësit e procesit të dialogut, shqiptarë e serbë, thonë se Kosova po shkon në një drejtim të gabuar në procesin e dialogut Kosovë-Serbi. Ata i bëjnë thirrje për reflektim palëve dialoguese.
I dërguari i posaçëm i Shteteve të Bashkuara për Ballkanin Perëndimor, Gabriel Escobar, është shprehur i alarmuar me kritikat që po i bëhen ndërmjetësuesit kryesor të procesit të dialogut, Miroslav Lajçak.
Andaj diplomati amerikan i ka bërë thirrje edhe njëherë Qeverisë së Kosovës të tregohet më konstruktive në dialog me Serbinë.
Madje sipas tij, Kosova nuk është në atë pozite që t’i diktojë taktikat e komunitetit ndërkombëtar.
“Lajçaku nuk do të largohet. Dialogu nuk do të largohet. Dhe nuk mendoj se një vend prej një milion e gjysmë do ta bindë komunitetin transatlantik prej 700 milionësh që të ndryshojë taktikat e tij. Mendoj se duhet të ketë një qasje më pragmatike nga Qeveria e Kosovës. Më duhet të them edhe diçka tjetër. Gjatë javës së fundit jam alarmuar nga sulmet personale ndaj Lajçakut që ekzistojnë në sferën shoqërore të Kosovës. I kërkova presidentes së Kosovës, Vjosa Osmani dhe Kryeministrit Kurti që t’i dënojnë këto sulme”, ka deklaruar Emisari i ShBA-së për Ballkanin Perëndimor, Gabriel Escobar.
Si të gabuar qasjen e Qeverisë së Kosovës në dialog me Serbinë e vlerëson edhe analisti politik, Agon Maliqi.
Ky, thotë se ndërmjetësi Lajçak nuk merr vendime pa u konsultuar me shtetet e tjera të bllokut evropian si dhe me Shtetet e Bashkuara të Amerikës.
Ndërkaq Jovana Radosavljeviq nga Iniciativa e re konsideron se dialogu mes Kosovës dhe Serbisë është në një pikë shumë të ulët.
Sipas saj palët nuk kanë fare besim tek njëra tjetra.
“Mbas asaj çfarë ndodhi në takimin e fundit në Bruksel, vlerësoj se dialogu është në pikën më të ulët. Si Kosova ashtu edhe Serbia nuk kanë fare vullnet për t’i zbatuar marrëveshjet për shkak se nuk po iu përshtaten, andaj të dyja palët po preferojnë që të vazhdojnë me status-quo. Për me tepër tani pala kosovare ka filluar ta humbas besimin edhe ndaj ndërmjetësit të këtij procesi, Miroslav Lajçak. Duke e parë këtë situatë mendoj se kriza vetëm sa po thellohet më shumë, prandaj edhe jam shumë skeptike për të ardhmen”, është shprehur Jovana Radosavljeviq nga Iniciativa e Re.
Ndryshe, Shtetet e Bashkuara të Amerikës dhe Bashkimi Evropian, sërish i kanë bërë thirrje Qeverisë së Kosovës që të mos humbas kohë por të filloj me themelimin e Asociacionit të Komunave me shumicë serbe.
