Në prag të fundjavës së festave, stuhia pritet të godasë rajonin e Great Lakes, priten shira dhe ngrica në Bregun Lindor, erë të fortë deri në 100 km në orë dhe i ftohtë i hidhur në jug deri në kufirin meksikan.
“Ndërsa stuhia përhapet mbi Great Lakes, pritet të ndodhë një fenomen i motit i njohur si një ciklon bombë”, tha Shërbimi Kombëtar i Motit. Sipas shërbimit të motit, cikloni mund të shkaktojë reshje të forta dëbore dhe erëra prej më shumë se 80 km/h në rajonet qendrore dhe në verilindje. Ka të ngjarë që si pasojë e stuhisë të ketë ndërprerje të energjisë elektrike dhe udhëtimi nga toka dhe ajri mund të jetë i rrezikshëm ose i pamundur.
“Më shumë se 48 shtete nga Uashingtoni në Florida janë në alarm për motin dhe njoftimet për përkeqësim të motit prekin 135 milionë njerëz”, tha metereorologu Robinson Cook.
Në disa zona si pjesa e mesme e Atlantikut mund të regjistrohen Krishtlindjet më të ftohta ndonjëherë. Të dielën në Filadelfia pritet që temperaturat të zbresin në minus 9 gradë celsius, më të ulëtat që nga viti 1943 ndërkohë që në qytetin Sioux në Ajova, termometri pritet të shënojë minus 26 gradë celsius, duke thyer rekordin e vitit 1980, raportoi Zëri i Amerikës.
Shoqata Amerikane e Automjeteve vlerëson se 112.7 milionë persona planifikojnë të udhëtojnë 80 km ose edhe më shumë mes datave 22 dhjetor deri ne 3 janar, 3.6 milionë më shumë njerëz se një vit më parë, për shkak të kufizimeve nga pandemia.
Më shumë se 2 mijë fluturime në SHBA të planifikuara të enjten dhe të premten u anuluan, përfshirë 700 nisje dhe mbërritje nga dy aeroporte në Çikago, sipas të dhënave të FlightAware. Qindra fluturime janë anuluar edhe në Denver.
Greg Carbin, shef i shërbimit meteorologjik në Qendrën e Parashikimit të Motit tha se temperaturat e ulëta pritet të godasin edhe Floridën duke shënuan një rënie prej 25 gradë celsius. “Është shumë ftohtë për në Florida”, tha ai.
Drejtuesit e automjeteve në Ohajo dhe Tenesi janë paralajmëruar se rrugët mund të ngrijnë për shkak të rënies së menjëhershme të temperaturave. Shërbimi i motit paralajmëroi shira edhe në Oregon dhe Uashington ku edhe nisi stuhia, të enjten vonë.
Xhorxhia, Karolina e Veriut dhe Kentaki kanë shpallur gjendjen e emergjencës. Në Xhorxhia temperaturat arritën në minus 12 gradë celsius. “Presim kushte moti që si kemi parë prej më shumë se një dekadë”, tha Guvernatori i Xhorxhias Brian Kemp në një konferencë për shtyp./KP/
