Ambasada amerikane në Bagdad po përgatitet për një evakuim të organizuar për shkak të rreziqeve në rritje të sigurisë në rajon, konfirmuan sot zyrtarët irakianë të sigurisë dhe burim amerikane për mediat britanike.
Ministri iranian i Mbrojtjes, Aziz Nasirzadeh, tha më herët gjatë ditës se Teherani do të sulmonte bazat amerikane në rajon nëse do të kishte një konflikt me Uashingtonin.
“Departamenti i Shtetit po planifikon një largim të organizuar të personelit nga Ambasada amerikane në Bagdad. Qëllimi është ta bëjmë këtë përmes mjeteve komerciale, por ushtria amerikane është e gatshme të ndihmojë nëse kërkohet,” tha një zyrtar tjetër amerikan.
Presidenti amerikan Donald Trump tha sot se është më pak i sigurt se Irani do të bjerë dakord të ndalojë pasurimin e uraniumit si pjesë e marrëveshjes bërthamore me Uashingtonin.
Një zyrtar tjetër amerikan tha se nuk kishte ndryshime në operacionet në Bazën Ajrore Al Udeid në Katar, baza më e madhe ushtarake amerikane në Lindjen e Mesme, dhe se nuk ishte lëshuar asnjë urdhër për evakuimin e punonjësve ose familjeve të lidhura me ambasadën amerikane në Katar, e cila po funksionon normalisht.
Kujtojmë, presidenti amerikan ka kërcënuar vazhdimisht se do të bombardojë Iranin nëse nuk bie dakord për një marrëveshje të re bërthamore.
