Shtetet e Bashkuara thanë të hënën se dëshirojnë që Këshilli i Sigurimit i OKB-së të miratojë një rezolutë që mbështet propozimin e paraqitur nga presidenti Joe Biden për t’i dhënë fund luftimeve mes Izraelit dhe militantëve palestinezë të Hamasit në Rripin e Gazës.
Shtetet e Bashkuara shpërndanë për vendet anëtare të Këshillit të Sigurimit një tekst paraprak, raporton Reuters.
Për miratimin e rezolutës duhen të paktën nëntë vota pro dhe asnjë veto nga Shtetet e Bashkuara, Franca, Britania, Kina apo Rusia.
Propozimi amerikan i bën thirrje Hamasit të pranojë marrëveshjen “plotësisht dhe të zbatojë parashikimet e saj pa vonesa dhe pa kushtëzime” të mëtejshme. Teksti gjithashtu “thekson rëndësinë e përmbajtjes ndaj këtyre kushteve të palëve pasi të jetë rënë dakord për marrëveshjen, me objektivin e arritjes së një pushimi të përhershëm të luftimeve”.
Ndërkaq më herët të hënën, ushtria izraelite konfirmoi vdekjen e katër pengjeve të tjera të rrëmbyera nga Hamasi, përfshirë të tre të moshuarve, që shiheshin në një video të grupit militant teksa luteshin për lirimin e tyre.
Tre të moshuarit u identifikuan si Amiram Cooper, Yoram Metzger dhe Haim Peri, të gjithë mbi 80 vjeç.
Pengu i katërt i konfirmuar i vdekur u identifikua si Nadav Popplewell. Sipas zëdhënësit të ushtrisë izraelite Daniel Hagari, katër pengjet vdiqën bashkë në qytetin Khan Younis të Rripit të Gazës, ndërkohë që Izraeli po kryente operacione në atë zonë.
Shkaku i vdekjes së tyre ende nuk është bërë i ditur. Izraeli beson se nga 130 pengjet që mbahen nga Hamasi, 85 janë ende të gjallë.
