Tash e një muaj Ramiz Bytyçi nga Shashkoci i Prishtinës nuk ka ujë.
Andaj për t’u furnizuar, ai u detyrua të hapë bunar.
Por pavarësisht kësaj, ai ende mbetet pa ujë.
“Kemi investu diku deri në pesë mijë euro e kemi furnizu deri tash por i ka ra ngarkesë e madhe me punu, na u ka prosh edhe ajo bile ndoshta e patë e kemi nxjerr cevën, duhet me shku me ble pompë të re, duhet me investu apet”, tha Bytyçi.
E ndonëse kafetë i kanë pirë, Mervete Bytyçi nuk ka me çka t’i lajë enët.
“Nuk di çka me ba, qe qeshmen, s’di qysh i laj enët, qe qysh i kam ba grumbull këtu, tybe as s’di edhe me shku ma larg me marr ujë, mu m’dhamin këmbët shumë,a s nuk muj as 10 metra me ec”, tregoi Mervetja.
Nga mungesa e ujit, Bytyçi tregon se për t’u pastruar po shkojnë tek familjarët.
Madje edhe festën e Bajramit këtë herë do ta kalojë ndryshe.
“Qe banjot pa ujë, tona tona hajde me la kishe për Bajram, qe, tmerr bre tmerr”, tha ajo.
Ndërsa ujë të pijshëm, banorët e Shashkocit po marrin tek kroi në krye të fshatit.
Aty po furnizohen me ujë edhe bagëtitë.
Banorët kanë gjetur edhe alternativa për të marrë ujë të pijshëm.
“Ujë po marrim në Graçanicë, me naj kerr me mushë kanta po badihava”, tha Tefik Bytyçi.
Ndërsa nga shtëpitë e pakta në Shashkoc që kanë ujë në pus është e Vehbi Bytyçit.
Këtë madje e ka hapur para disa viteve, kur banorët u ballafaquan me problemin e njëjtë sikurse tash.
“Është një defekt, rezervuari është i plasaritur e rrjedh një sasi të ujit po këtë e kemi lajmëru këtë qe 5-6 vjet. Edhe ata nuk kanë gjetë mundësinë me ardhë me ndreq atë pjesë”, tha ai.
Rreth këtij problemi, tëvë1 ka pyetur KRU ‘’Prishtina’’, mirëpo deri në publikimin e kësaj kronike të njëjtët nuk kanë kthyer përgjigje.
