Xherdan Shaqiri vazhdon të mbetet një nga figurat kryesore në futbollin ndërkombëtar, pavarësisht moshës dhe ndryshimeve të shumta në karrierën e tij. Së fundmi, një analizë statistikore e publikuar nga Football Observatory, pjesë e Qendrës Ndërkombëtare për Studime Sportive (CIES), e rendit mes dhjetë lojtarëve më të mirë në botë për krijimin e rasteve për gol.
Në këtë renditje, që bazohet në performancat e gjashtë muajve të fundit në ligat elitare të botës, Shaqiri zë vendin e dhjetë me 91.5 pikë, duke lënë pas shumë emra të mëdhenj të futbollit. Në krye të listës qëndron ylli i ri i Barcelonës, Lamine Yamal, me 100 pikë, ndërsa menjëherë pas tij renditen emra si Mohamed Salah i Liverpoolit (vend i katërt, 95.2 pikë) dhe Kevin De Bruyne i Napolit (vend i gjashtë, 93.3 pikë).
Indeksi i krijimit të rasteve përfshin disa faktorë kyç si,numri i pasimeve që çojnë në një gjuajtje drejt portës, pesha e tyre sipas vlerës “expected goals” (xG), pasime vendimtare ku vetëm një mbrojtës kundërshtar është mes topit dhe portës.
Për të marrë një ide më të qartë, lojtari me performancën më të mirë në këtë periudhë arrin 100 pikë, ndërsa të tjerët renditen në krahasim me këtë standard maksimal.
Kjo statistikë jo vetëm që vërteton rëndësinë e Shaqirit në skuadrën e tij aktuale, por edhe thekson se ai vazhdon të jetë një lojtar me ndikim të madh në nivelin ndërkombëtar. Për FC Baselin, kjo është një dëshmi shtesë se kanë në radhët e tyre një lojtar të kalibrit botëror, që konkurron krah për krah me yje të mëdhenj të futbollit.
