Xherdan Shaqiri do të jetë kapiten i ekipit Chicago Fire për këtë edicion dhe këtë e ka konfirmuar edhe trajneri Frank Klopas.
Shaqiri ishte kapiten edhe në ndeshjen e parë të edicionit 2024, në të cilën Chicago barazoi 2:2 me Philadelphia Union.
Reprezentuesit të Zvicrës i është besuar shiriti i kapitenit, përgjegjësi që deri vonë e ka pasur mbrojtësi Rafa Czichos. Megjithatë, Czichos vullnetarisht ka hequr dorë nga shiriti i kapitenit, i cili tashmë i është besuar Shaqirit.
Trajneri Klopas ka bërë të ditur se tani kapiten i ekipit të tij do të jetë Shaqiri duke pasur parasysh se vlerësohet si një lider i vërtetë te Chicago Fire. Po ashtu, tek ekipi amerikan kanë besim të madh në kapitenin e ri, në këtë rast Shaqirin.
“E di që në të kaluarën, sa herë që Shaqiri ka pasur mundësinë të vendosë shiritin, ai e ka përqafuar atë përgjegjësi. Sa më shumë presion që të bëni mbi të, ai e vlerëson atë dhe është i gatshëm për sfida”, është shprehur Klopas.
Shaqiri 32-vjeçar në fillim të vitit 2022 iu bashkua ekipit që bën gara në MLS dhe ka kontratë deri në fund të këtij viti. Para transferimit në SHBA, Shaqiri ka bërë karrierë në Evropë, ku ka luajtur për Lyonin, Liverpoolin, Stoke Cityn, Interin, Bayernin dhe Baselin.
