Deputeti i Partisë Demokratike të Kosovës (PDK), Ferat Shala, thotë se Qeveria e Kosovës po e saboton punën e Kuvendit me mospjesëmarrje në seanca.
Kjo pasi që edhe në seancën e sotme të jashtëzakonshme ftuar për çështjen e borxheve të ambalazhuesve të ujit pushteti është duke munguar.
Ai ka thënë se nga kjo Qeveri kanë sabotim e ikje nga përgjegjësia lidhur me çështjen e borxheve.
“Më 23 prill të këtij viti kemi kërkuar që të themelohet një komision hetimor për çështjen e borxheve të ambalazhuesve të ujit, e duke iu shmangur kësaj, mazhoranca na sjell deri në këtë moment. Përsëri kemi sabotim dhe ikje nga përgjegjësia. Drejtësia dhe institucionet shtetërore kanë marrë hapa konkretë për zbardhjen e kësaj afere. Arsyeja e kërkesës sonë është transparenca dhe e vërteta. Kërkojmë nga Qeveria t’i marrë të mirëqena dhe si demokratike e ligjore kërkesat tona”, ka thënë Shala.
Para se të fillonte seanca deputetët e Partisë Demokratike të Kosovës vendosën kapela të zeza tek ulëset e deputetëve të Lëvizjes Vetëvendosje.
Kuvendi filloi seancën edhe me një minutë heshtje në nderim të komandantit të parë i KFOR-it, Gjenerali Sir Mike Jackson./teve1.info/
