Gëzim Shala nga Instituti i Kosovës për Drejtësi, ka thënë se propozimi i i deputetëve për kryetar të Kuvendit që dihet se nuk i kanë votat e mjaftueshme është skenar për vazhdim të bllokadës.
Ai ka thënë se për konstituimin e Kuvendit janë dy rrugë, ajo e propozimit të deputetëve që kanë mbështetjen edhe të partive tjera, ose arritja e një marrëveshje politike.
“Rruga e parë është që propozohen kandidatët të cilët dihet se e kanë shumicën e nevojshme që për tu përzgjedhur në pozitën e kryetarit të Kuvendit të Kosovës. Rruga e dytë e një marrëveshje politike me një parti tjetër përmes secilës konstituohet Kuvendi dhe formohet qeveria. Në situatë që jemi propozimi i një kandidati tjetër i cili nuk i ka votat për të cilin na e dimë që nuk i ka votat brenda Kuvendit të Kosovës është skenar i radhës bllokues i Vetëvendosjes”, është shprehur Shala në emisionin “Mesditë” në Tëvë1.
Ai ka komentuar edhe mungesën e katër deputetëve në seancën e së mërkurës, ku sipas aktgjykimit të Gjykatës Kushtetuese të gjithë deputetët duhet të jenë në seancën konstituive dhe të marrin pjesë.
Shala ka thënë se nuk i di arsyet e mungesës së tyre , por ka thënë se mospjesëmarrja e Shqipe Selimit në votim kur u propozua Donika Gërvalla është moszbatim i aktgjykimit.
“Në rastin konkret kemi moszbatim të aktgjykimit të Gjykatës Kushtetuese dhe ka pasur mundësi të votojë për, kundër ose abstenim dhe jo mos të marrë pjesë në votim”, ka thënë Shala.
