Analisti politik Ibrahim Shala ka vlerësuar se ekziston mundësia e arritjes së një marrëveshjeje për bashkëqeverisje mes Lëvizjes Vetëvendosje (LVV) dhe Lidhjes Demokratike të Kosovës (LDK), duke theksuar se liderët e dy partive kanë reflektuar për të shmangur mbajtjen e zgjedhjeve të reja.
Në emisionin “Ditari” në Tëvë1, Shala ka thënë se kryetari i LVV-së, Albin Kurti, dhe ai i LDK-së, Lumir Abdixhiku, kanë arritur në përfundimin se bashkëpunimi është i domosdoshëm në rrethanat aktuale politike.
Sipas tij, për të arritur një marrëveshje, të dyja palët duhet të tregojnë gatishmëri për kompromis.
“Në këtë situatë ngërçi, unë mendoj se për të mos shkuar edhe njëherë në zgjedhje tjera kanë reflektuar liderët politikë. Kjo shihet sidomos te Kurti dhe te Abdixhiku, të cilët kanë arritur në një konkluzion se të dy kanë nevojë për një marrëveshje”, është shprehur Shala.
Ai ka shtuar se Abdixhiku në takimin me Kurtin paraqitet me një mandat të qartë nga strukturat e LDK-së, pas kuvendit të fundit të partisë.
“Abdixhiku në takimin e sotëm do ta përfaqësojë qëndrimin unik të LDK-së. Ai shkon i përgatitur dhe është përfaqësues legjitim e i plotfuqishëm pas atij kuvendi të LDK-së”, ka thënë ai.
Sipas Shalës, edhe LDK-ja ka interes të jetë pjesë e qeverisë, pasi kjo do të ndikonte në rigjenerimin e partisë pas sfidave të brendshme që ka kaluar.
“Duke i analizuar rrethanat, të dy kanë nevojë për të gjetur një rrugë bashkëpunimi dhe janë të vetëdijshëm se duhet të bëjnë lëshime. Nëse e arrijnë këtë, atëherë do të ketë efekte shumë pozitive për zhvillimet politike në vend”, ka përfunduar ai.
Ndryshe, kreu i Lëvizjes Vetëvendosje, Albin Kurti, dhe ai i Lidhjes Demokratike të Kosovës, Lumir Abdixhiku, do të takohen në ambientet e Kuvendit, me synimin për të arritur një marrëveshje për krijimin e institucioneve të reja të vendit, pas zgjedhjeve të qershorit.
LDK-ja ka thënë se është e gatshme të ndihmojë në krijimin e institucioneve të reja.
Megjithatë, partia e Abdixhikut ka thënë se dëshiron marrëveshje për tri institucionet: Kuvendin, Qeverinë dhe Presidencën.
Takimi vjen dy ditë para mbajtjes së seancës konstituive për legjislaturën e njëmbëdhjetë.
Kurti u dërgoi ftesa një ditë më parë edhe kryetarit të Partisë Demokratike të Kosovës, Bedri Hamza, dhe atij të Aleancës, Ardian Gjini, por që të dy refuzuan takimin me të.
Kjo është hera e dytë që Kurti takohet me Abdixhikun, pasi ai më 10 korrik kishte takuar ndaras atë, dhe kreun e PDK-së./teve1.info/
