Zyrtari policor, Fahri Shala i cili kishte mbetur i lënduar në sulmi terrorist në Banjskë të Zveçanit ka dhënë dëshminë e tij në gjykatë.
Ai ka thënë se pas marrjes së informacionit për bllokim të rrugës në fshatin Banjksë janë nisur në vendin e ngjarjes.
Shala ka thënë se për dallim prej netëve të kaluara dritat në shtëpitë e fshatit kanë qenë të fikuara.
“Pasi jemi nisur në drejtim të fshatit Banjskë, e kemi njoftuar dhomën komanduese dhe stacionin tonë, se jemi rrugës. Me të arritur tek hyrja e fshatit Banjskë, e kam ndaluar veturën diku rreth 20 metra afër kamionëve. Kemi dalë nga vetura dhe kemi vazhduar në drejtim të kamionëve. Kemi bisedu edhe për vendin e ngjarjes. Një dallim nga herët e kaluara, shumica e shtëpive nuk kanë pasur drita të ndezura fare. Ndërsa ku ishim ne, ka pasur shtylla me dy drita të vendosura, pra ka qenë një ndriçim shumë i madh”, ka thënë ai.
Shala ka folur edhe për momentin e shpërthimit, si pasojë e të cilit mbeti i vrarë rreshteri Afrim Bunjaku.
“Duke diskutuar që mos me i prek kamionët se munden me pas eksplozivë, e kemi dëgjua një detonim të madh. Pa përfundua zhurma e detonimet, kanë fillu të shtënat e armëve ne drejtim tonin. Aty kam fillua të shtie në drejtim të tyre dhe të eci mbrapa si mburojë. Kam shiku mbrapa e nuk i kam parë kolegët, kam bërtitur me zë “A jeni mirë” se nuk e disha se çfarë ka ndodhë. Nuk është përgjigjur askush, e pas 30 sekondash kam kaluar tek kamioni tjetër dhe aty e kam vërejt se ka qenë një koleg i shtrirë. Pasi ishte i kërrusur nuk kam mundur ta identifikojë, e kam thirr “koleg, koleg” por nuk është përgjigjur. Jam afru tek ai dhe e kam vërejt që është rreshteri. E kam vendosur dorën në qafë për ta parë nëse ka puls, por për shkak të krismave nuk kam mund me kuptua”, ka thënë Shala.
Shala ka thënë se të shtënat kanë ardhur prej më shumë se 20 vende dhe se sipas tij përzgjedhja që sulmi të kryhet në Banjskë tregon se grupi ka qenë i mirëorgnizuar dhe i mbështetur nga Serbia.
“Ve fakti që është përzgjedhur ky fshat, na lë të kuptojmë se ka qenë grup i mirë organizuar, i trajnuar dhe i pajisur mirë me armatim. Kështu kuptohet se ka qenë i mbështetur nga struktura shtetërore dhe është trajnuar nga strukturat shtetërore të Serbisë. Ka qenë grup i mirëformuar se kanë përdorë gjuajtjet pjesë – pjesë për me avancu tek ne. Deri atë natë nuk kam hasur në kësi raste. Armatimin që e kanë përdorur, eksplozivin, e bllokimi i rrugëve ka qenë në drejtim të Policisë së Kosovës, uniformës sonë, për të bërë dëme sa më të mëdha në Polici. Shpresoj që ky grup terrorist të merr dënimin e merituar”, ka thënë Shala.
