Ish-kryetari i Gjykatës së Apelit, Hasan Shala, ka hedhur kritika ndaj Qeverisë së re dhe disa prej përfaqësuesve të saj.
Sipas tij, bllokada një vjeçare ndodhi si pasojë e partisë fituese, e cila nuk arrinte marrëveshje politike me subjektet politike për t’i siguruar votat e mjaftueshme për votimin e nënkryetarëve të Kuvendit.
Ndërkaq, pas konstituimit të Kuvendit dhe formimit të Qeverisë së re, Shala, Albulena Haxhiun dhe Sllavko Simiqin i konsideron si “fituesit më të mëdhenj”.
Ai thotë se i gjithë ngërçi vitin e kaluar ndodhi për shkak të këtyre dy emrave dhe dy këtyre pozitave.
Shala ka komentuar edhe qëndrimet e deputetit Agim Bahtiri, për të cilin tha se ka ndryshuar deklarimet e tij brenda një kohe të shkurtër
“Fituesit më të mëdhenj nga krejt kjo procedurë janë Albulena Haxhiu dhe Sllavko Simiq. Krejt kjo punë është shtyrë për institucione shtetërore. Albulena Haxhiu u zgjodh kryetare, Simiq u zgjodh nënkryetar. Deri dje, Agim Bahtiri ka thënë qe edhe e prenë dorën, dje e çoi dyfish dorën. Mentaliteti i këtij pushteti dhe kësaj partie politike e harron atë se çfarë ka thënë dje. Nuk ka përgjegjësi për atë fjalë që e ka thënë dhe veprimet që i ka ndërmarrë, sot i ndryshon krejt”, deklaroi Shala.
Në vijim, ish-kryetari i Gjykatës së Apelit ka akuzuar kryeministrin Albin Kurti dhe ekzekutivin për ndërhyrje në institucionet e drejtësisë.
“Kurti dhe Qeveria e tij kanë ndërhyrë gjithnjë në institucionet e drejtësisë. Përgjegjësia më e madha këtu është e vetë Kurtit, i cili, i pari nuk iu është përgjigjur thirrjeve të Prokurorisë për dhënien e dëshmisë”, ka thënë Shala. /teve1.info/
