Agim Shahini, kryetar i Aleancës Kosovare të Bizneseve ka thënë se protesta e së enjtes e organizuar nga bizneset ka ardh si rezultat i shterjes së gjitha mundësive për shfuqizimin e vendimit të ZRrE-së për tregun e hapur energjetik për bizneset.
Ai ka treguar se gjatë protestës për dy orë nga ora 10-12, hyrjet për në Prishtinë do të jenë të bllokuara.
Protesta vije pas përfundimit të gjitha mundësive të dialogimit dhe mundësive tjera për të zhbërë këtë vendim nga ZRrE.
“Do të mbyllen katër rrugë në hyrje të Prishtinës, Veternik në hyrje nga Fushë-Kosova, Mitrovica dhe Podujeva me mauna të punës të kompanive që janë pjesë e kësaj proteste”, ka thënë Shahini në emisionin “Ditari” në Tëvë1.
Ai ka thënë se nëse nuk ka shfuqizim të vendimit i cili pritet të hyjë në fuqi nga 1 qershori, protestat do të vazhdojnë.
Shahini ka thënë ata nuk janë kundër tregut të lirë energjetik, por siç ka thënë ai monopolit që është krijuar.
“Nuk është askush kundër tregut të hapur energjetik por jemi kundër monopolit që është krijuar dhe ne kemi vetëm një distributor që ka dhënë oferta nga 18 apo 19 të licencuara. Ky nuk është liberalizim i tregut”, ka thënë Shahini.
Ai ka thënë se bizneset nuk janë të përgatitura për një gjë të tillë duke kërkuar edhe shtyrje të fuqizimit të vendimit.
Nga 1 qershori kompanitë të cilat kanë më shumë se 50 punëtor apo 10 milionë euro qarkullim do të zgjedhin vetë kompaninë me të cilën do të furnizohen me energjike elektrike.
Ky vendim i ZRrE-së është kritikuar edhe nga avokati i popullit.
Bizneset kanë thënë se me këtë vendim ata do të paguajnë shumë më shtrenjtë për energjinë e shpenzuar.
