Policia e Kosovës ka dhënë detaje për të shtënat me armë zjarri që kanë ndodhur në Podujevë, ku si pasojë kanë mbetur të plagosur katër persona.
Në një konferencë për media, nënkoloneli dhe drejtori i Drejtorisë Rajonale të Policisë në Prishtinë, Basri Shabani, tha se tre nga të plagosurit kanë qenë të përfshirë në incident, ndërsa njëri është kalimtar i rastit.
“Si pasojë e përdorimit të armës janë plagosur katër persona. Tre prej tyre kanë qenë të përfshirë në incident, ndërsa njëri është kalimtar i rastit, i cili për fat të mirë ka lëndime të lehta trupore”, ka thënë Shabani.
Ai bëri të ditur se të gjithë të plagosurit janë duke u trajtuar në Qendrën Klinike Universitare të Kosovës (QKUK).
“Sipas informacioneve të deritanishme, personat e përfshirë në këtë situatë janë të lënduar dhe po trajtohen në QKUK në Prishtinë”, ka shtuar ai.
Sa i përket motivit të ngjarjes, Shabani tha se hetimet janë në fazën fillestare, por dyshohet se rasti lidhet me probleme familjare.
“Po, kanë lidhje familjare të përfshirët dhe janë probleme familjare”, ka deklaruar Shabani.
Policia e Kosovës ka bërë të ditur se hetimet për zbardhjen e plotë të rrethanave të rastit janë duke vazhduar.
