Kandidati i Lidhjes Demokratike të Kosovës për kryetar të Shtimes, Kastriot Shabani është shprehur i bindur se gjatë mandatit të tij do të arrijë të realizojë synimin për ta transformuar këtë qytet.
Shabani, në emisionin “Ditari” në Tëvë1, ka thënë se për të, model i qeverisjes së mirë është kryetari i Komunës së Lipjanit nga LDK-ja, Imri Ahmeti.
“Unë po besoj shumë që ne si Lidhje Demokratike e Kosovës dhe në veçanti unë si Kastriot Shabani do ta arrijmë qëllimin për ta transformuar qytetin e Shtimes. Qytetarët e Shtimes e din që ky qytet transformohet me investime të mëdha. Unë mendoj se pavarësisht bindjeve politike puna e mirë e secilit duhet të vecohet dhe ne e kemi në pushtet Lidhjen Demokratike të Kosovës model që është në Lipjan Imri Ahmeti. Transformimet që kanë ndodhur në kohën sa është Ahmeti aty është model për ne”, ka thënë Shabani.
Shabani ka prezantuar disa nga prioritetet e plan-programit të tij për Komunën e Shtimes.
“Ne paraprakisht kemi punuar bashkë me ekipin tonë dhe ekspertë për plan-programin tonë për mandatin 4-vjeçar. Kemi pasur gjithashtu një bashkëpunim me një kompani projektuese, nga e cila kemi hartuar një program qeverisës shumë të detajuar. Kemi gjithashtu një plan për investimet kapitale, që përfshijnë projekte si nënkalimi, bulevardi, stacioni i autobusëve, Memoriali i Lirisë, parku i pishave, zgjerimi i rrugës me katër korsi nga fshati Belinc deri te rrethrotullimi i shkollës “Emin Duraku”, si dhe nga rrethrotullimi te Agrokopi deri në hyrje të Shtimes, deri te sheshi “Adem Jashari”, ka premtuar ai.
