Bedri Shabani dhe Muharrem Qerimi kanë dalë para gjykatës, ku janë deklaruar sërish të pafajshëm për akuzën e spiunazhit.
Në fjalën hyrëse, prokurori special Bekim Kodraliu ka deklaruar se provat që do të administrohen gjatë shqyrtimit gjyqësor do të dëshmojnë, sipas Prokurorisë, se të pandehurit kanë ndihmuar dhe i kanë shërbyer Agjencisë së Inteligjencës dhe Sigurisë së Serbisë (BIA), duke cenuar rendin kushtetues dhe sigurinë e qytetarëve të Kosovës.
“Prokuroria Speciale ka ngritur aktakuzë kundër të pandehurve Bedri Shabani dhe Muharrem Qerimi, të cilët veç e veç kanë kryer veprën penale ‘Spiunazhi’, ndërsa i akuzuari Muharrem Qerimi akuzohet edhe për mbajtje të paautorizuar të armëve, për të cilën vepër në shqyrtimin fillestar e ka pranuar fajësinë”, ka thënë Kodraliu.
Prokurori ka theksuar se ekzistojnë prova konkrete për aktivitetet e dyshuara të spiunazhit të BIA-s në Kosovë. Sipas tij, gjatë gjykimit do të paraqiten më shumë se 30 raporte policore, raporte të Agjencisë së Forenzikës së Kosovës, konfirmime zyrtare nga AKI-ja, dokumente, fotografi dhe materiale të tjera të sekuestruara.
Sipas aktakuzës, Bedri Shabani dyshohet se, nga një periudhë e pacaktuar deri në arrestimin e tij më 5 qershor 2024, ka mbledhur dhe përcjellë te BIA informacionе, dokumente dhe materiale që lidhen me Ushtrinë Çlirimtare të Kosovës, përfshirë eprorët e saj, Spitalin Ushtarak të UÇK-së në Mollopolc të Shtimes dhe masakrën e Reçakut.
Prokuroria pretendon se këto informacione Shabani ia ka përcjellë Sërgjan Rosiqit, të cilin aktakuza e identifikon si zyrtar të lartë të BIA-s përgjegjës për rajonin e Pançevës, si dhe Bogoljub Janiçeviqit, ish-komandant i policisë serbe për rajonin e Ferizajt gjatë luftës në Kosovë.
Sipas prokurorit Kodraliu, një pjesë e provave lidhet edhe me materiale që pretendohet se e ndërlidhin spitalin e Mollopolcit me të ashtuquajturën “Shtëpia e Verdhë” në Shqipëri.
Ndërkaq, Muharrem Qerimi akuzohet se, nga viti 2012 deri në arrestimin e tij më 5 qershor 2024, ka mbledhur dhe përcjellë informacione e materiale që lidhen me luftën në Kosovë dhe pjesëtarët e UÇK-së.
Sipas aktakuzës, informacionet e dyshuara përfshijnë edhe emra të zyrtarëve të Policisë së Kosovës, AKI-së dhe Inspektoratit Policor të Kosovës, si dhe të dëshmitarëve të Dhomave të Specializuara të Kosovës në Hagë.
Prokuroria pretendon se Qerimi ia ka transmetuar këto informacione Sërgjan Rosiqit përmes komunikimeve telefonike dhe takimeve fizike në territorin e Serbisë.
Të gjitha këto pretendime përbëjnë akuza që duhet të shqyrtohen dhe të vlerësohen nga gjykata. Bedri Shabani dhe Muharrem Qerimi janë deklaruar të pafajshëm për akuzën e spiunazhit, ndërsa procedura gjyqësore do të përcaktojë përgjegjësinë eventuale penale të secilit të pandehur.
