Sesioni vjeshtor i punimeve në Kuvendin e Kosovës, për deputetët është më ndryshe.
Paraprakisht ata njoftuam me diçka të re.
Në ulëset e tyre u vendosën doracak të përdorimit të pajisjeve të reja elektronike.
Tashmë ata votën e tyre do ta shfrytëzojnë në mënyrë elektronike.
Por, kjo nuk ndikoi në ballafaqimin midis pozitës dhe opozitës.
Qysh në fillim të seancës, deputeti nga mazhoranca Armend Muja, përmendi rritjen ekonomike në vend duke shtuar se 26% është rritur buxheti i Kosovës.
“ Po të mos ishim ne, ju them me përgjegjësi të plotë, që 1 miliardë euro në buxhetin e shtetit nuk do të ishin, dhe rrjedhimisht i gjithë financimi i shtesave për fëmijë, i gjithë financimi për ushtrinë, do të mungonte, pra kjo është origjina e financimit, të programeve qeveritare”, tha Muja.
Me këtë nuk u pajtua deputetja nga LDK-ja, Hykmete Bajrami.
“ 923 milionë prej atyre 1.1 miliardëve vinë prej inflacionit, 923 milionë vinë prej inflacionit, a e dini çfarë do të thotë kjo, në vitin 2023 i ki rrafsh katërqind e tridhjetë milionë rritje prej inflacionit, inflacioni gjatë qeverisjes suaj, i ka kushtuar ekonomisë së këtij vendi, 1.6 miliardë euro”, u shpreh Bajrami.
Ndërkaq deputeti Muja u pengua nga opozita në momentin që replikoi me deputeten Bajrami.
Disa fjalë për punët e qeverisë pati edhe kryetari i LDK-së, Lumir Abdixhiku.
“ Në pabesinë më të madhe historike, kemi zënë vendin e ankuesve ndaj aleatëve tanë i sulmojmë ata, i godasim ata, për të marrë në fund asnjë rezultat vetëm se vulën e fajtorit dhe njollën e një shteti të vetmuar me të cilin nuk do të merret asnjë vend evropian. Prandaj për katër vjet nuk kemi asnjë njohje, nuk kemi asnjë anëtarësim, prandaj ne Republika e Kosovës jemi nën masa dhe nën sanksione”, tha Abdixhiku.
E ministrja e Arsimit, Arbërie Nagavci u kritikua nga opozita për rritje të çmimit të librave, ajo tha se do të shqyrtohet nëse ka shkelje.
“ Jemi në bashkëpunim edhe me ministrin e linjës në mënyrë që çdo shkelje e identifikuar të marrë masa sipas legjislacionit në fuqi”, tha Nagavci.
Deputetët votuan zgjedhjen e një anëtari shqiptar për bordin e RTK-së, ndërsa përveç deklarimeve jashtë rendit të ditës e pyetjeve parlamentare, në rend dite ishte edhe votimi i disa pikave që nuk kanë arritur të miratohen në seancat e sesion pranveror.
Pas pauzës një orëshe, kjo seancë dështoi për të vazhduar punimet pasi që nuk pati kuorum.
