Profesori amerikan dhe njohësi i zhvillimeve në Ballkan, Daniel Serwer, ka bërë të ditur se ka zhvilluar një takim me ish-presidentin e Kosovës, Hashim Thaçi, në qendrën e paraburgimit në Hagë, ku ky i fundit po mbahet gjatë procesit gjyqësor në Dhomat e Specializuara.
Në një shkrim autorial të titulluar “Një gjykatë që ka humbur rrugën”, Serwer tregon se takimi me Thaçin ka zgjatur rreth 40 minuta dhe është zhvilluar në seksionin ndërkombëtar të burgut holandez.
Ai thekson se qëllimi i vizitës ka qenë rifreskimi i një miqësie të vjetër.
“Kalova 40 minutat e mia të caktuara me ish-presidentin e Kosovës, Hashim Thaçi, në seksionin ndërkombëtar të burgut holandez në Hagë. Doja të ripërtërija një miqësi të kahmotshme. Dihet mirë në Kosovë se unë dhe ai patëm një mospajtim pak para se ai të shkonte vullnetarisht në Hagë për t’u gjykuar”, ka shkruar Serwer.
Profesori amerikan ka shtuar se përmbajtja e bisedës do të mbetet konfidenciale, por ka nënvizuar se gjatë viteve, Thaçi gjithmonë ka respektuar mendimet e tij.
“Nëse po kërkoni ndonjë detaj për atë që më tha Hashimi, mos lexoni më tej. Bisedat tona kanë qenë gjithmonë private dhe edhe kjo do të mbetet e tillë. Ai gjithmonë e ka respektuar të drejtën time për të folur lirshëm në publik”, shkruan Serwer.
Gjatë qëndrimit në Hagë, Serwer është takuar edhe me zëdhënësin e Dhomave të Specializuara, Michael Doyle, me të cilin ka biseduar për mënyrën se si po funksionon gjykata që po zhvillon procesin kundër ish-krerëve të Ushtrisë Çlirimtare të Kosovës.
“Doja të kuptoja më mirë realitetin pas kësaj gjykate, ndaj u takova edhe me zëdhënësin e saj, Michael Doyle, të cilin e njoh nga puna e tij e shkëlqyer me përfaqësuesin e lartë Inzko në Bosnjë”, ka shkruar ndër të tjera Serwer.
