Profesori amerikan dhe njohësi i çështjeve të Ballkanit, Daniel Serwer, ka kritikuar ashpër Dhomat e Specializuara të Kosovës pas aktgjykimit dënues ndaj ish-presidentit Hashim Thaçi dhe tre ish-krerëve të tjerë të Ushtrisë Çlirimtare të Kosovës.
Në një opinion të publikuar në faqen e tij “Peacefare.net”, Serwer ka deklaruar se, sipas tij, nuk është vetëm aktgjykimi që është i padrejtë, por edhe vetë gjykata.
Serwer ka argumentuar se Dhomat e Specializuara u krijuan pas presionit amerikan dhe evropian ndaj Kosovës dhe se, ndonëse ligjërisht janë pjesë e sistemit juridik të Kosovës, ato funksionojnë me staf ndërkombëtar.
Duke komentuar dënimin e Thaçit me 25 vjet burgim, Serwer ka shprehur dyshime për ekzistencën e një autoriteti komandues të Thaçit mbi forcat e UÇK-së që kryen krime.
Ai ka thënë se këtë qëndrim e mbështet edhe në dëshmitë e amerikanëve që, sipas tij, kanë pasur njohuri për situatën gjatë luftës, si dhe në një bisedë që pretendon se ka zhvilluar me Thaçin pas luftës.
Serwer ka krahasuar gjithashtu trajtimin e ish-krerëve të UÇK-së me zhvillimet politike në Serbi, duke përmendur presidentin Aleksandar Vuçiç dhe nderimet e bëra për ish-komandantin serb të dënuar për gjenocid, Ratko Mlladiç.
Sipas tij, Thaçi dhe ish-krerët e tjerë të UÇK-së do ta apelojnë vendimin dhe procesi mund të zgjasë me vite.
Serwer ka shprehur shpresën se dënimet mund të reduktohen në fazat e ardhshme të procesit gjyqësor.
Në fund të opinionit, Serwer ka kritikuar politikën amerikane dhe evropiane, duke pretenduar se ajo ka ndryshuar qasjen ndaj ish-udhëheqësve të UÇK-së dhe se drejtësia ndërkombëtare është shndërruar, sipas tij, në “hakmarrje politike”.
“Amerikanët dhe evropianët duhet të ndihen të turpëruar”, ka shkruar Serwer, duke e përmbyllur opinionin me qëndrimin: “Nuk është vetëm vendimi ai që është i padrejtë. Është vetë gjykata.”
