Në nisje të seancës, kryesuesi i seancës konstituive, Avni Dehari sërish ftoi partitë politike për të propozuar emrat e kandidatëve për Komisionin Ad-hoc për votim të fshehtë, por kësaj thirrje nuk iu përgjigjen pozitivisht partitë e tjera.
Pro votimit të Komisionit për votim të fshehtë të kryekuvendarit votuan 54 deputetë, dhe nuk pati asnjë votë kundër dhe asnjë abstenim.
Të pranishëm në seancën konstituive të Kuvendit të Kosovës e cila ishte vazhdimësi e seancës së 15 prillit, morën pjesë 92 deputetë.
Në këtë mënyrë Kuvendi i Kosovës nuk arriti të konstituohej as në përpjekjen e 14-të.
Konstituimi i Kuvendit ka ngecur pasi Lëvizja Vetëvendosje nuk po arrin t’i sigurojë 61 votat e nevojshme për të zgjedhur Albulena Haxhiun kryetare të Kuvendit.
