Mbrojtësi legjendar spanjoll Sergio Ramos, 39 vjeç, mund të rikthehet në futbollin evropian.
Sipas gazetarit të njohur të merkatos Fabrizio Romano, Ramos po largohet nga Monterrey pas një periudhe ku ka luajtur rregullisht dhe ka paraqitur nivel të mirë, ndërsa emri i tij i është propozuar AC Milanit.
Romano, përmes kanalit të tij në YouTube, deklaroi se Ramos është në kërkim të një përvoje të re dhe nuk mendon aspak për pensionim. Ai theksoi se mbrojtësi ka ende pak shpresë për të qenë pjesë e Spanjës në Kupën e Botës, ndërsa mund të jetë një mundësi konkrete për një klub që kërkon lidership dhe përvojë në repartin defensivë.
Objektivi i lojtarit është një transferim i menjëhershëm në janar dhe jo një marrëveshje për verën.
Romano zbuloi se Ramos i ishte ofruar Interit dy vite më parë, para se të firmoste me Sevilen, por atë kohë zikaltrit nuk kishin interes.
Tani agjentët e tij janë duke e ofruar te disa klube, dhe Milani raportohet si një ndër opsionet kryesore, duke qenë se kuqezinjtë po kërkojnë një përforcim në mbrojtje për gjysmën e dytë të sezonit.
Kontrata e Ramos me Monterrey skadon më 31 dhjetor 2025, ndërsa këtë sezon në Liga MX Apertura ai ka regjistruar 15 paraqitje dhe 2 gola.
Nëse Milani vendos të lëvizë, atëherë një ikonë e futbollit botëror mund të zbarkojë në San Siro që në merkaton e janarit.
