Selektori i Serbisë, Dragan Stojkoviq ka folur në prag të ndeshjes me Kombëtaren e Shqipërisë, e cila luhet të shtunën në Leskovc për kualifikimet e Kupës së Botës 2026.
Stojkoviq ka bërë ndërrime në listën e tij, ndërsa ka bërë thirrje që të bëhet tifo në mënyrë korrekte, duke pasur parasysh rëndësinë e këtij takimi.
Sipas tij, përballja me Shqipërinë vendos se cila prej Kombëtareve do të zë pozitën e dytë në grup, duke insistuar se Serbia është gati për barazh.
“Duhet të bëjmë një paraqitje të mirë, të bëjmë lojë me intensitet dhe të arrijmë te fitorja. E kemi parasysh se çka do të thotë fitorja, barazimi dhe humbja në këtë ndeshje, ndonëse këtë të fundit as që po e mendojmë”, ka thënë Stojkoviq.
Ai ka insistuar se nuk do të jetë lehtë as për Serbinë, por as për Shqipërinë në këtë përballje të rëndësishme.
“Kjo ndeshje është me rëndësi të madhe për ne sa i përket rezultateve dhe vazhdimit të kualifikimeve. Besoj se jemi të gatshëm për barazh dhe këtë duhet ta dëshmojmë në këtë duel vendimtar”, shtoi Stojkoviq.
Ndeshja e parë mes Shqipërisë dhe Serbisë, e luajtur në Tiranë, ka përfunduar pa gola.
