Bazuar në të dhënat nga buxhetet e miratuara për vitin 2026, vendet e rajonit kanë ndarë shuma të konsiderueshme financiare për sektorin e mbrojtjes, duke reflektuar prioritetet e tyre strategjike dhe angazhimet në fushën e sigurisë.
Serbia kryeson listën si vendi me buxhetin më të madh për mbrojtje në rajon. Për vitin 2026, autoritetet serbe kanë ndarë rreth 2.35 miliardë euro, një shifër që e vendos vendin dukshëm përpara vendeve të rajonit.
Në vendin e dytë renditet Shqipëria, e cila për sektorin e mbrojtjes ka planifikuar një buxhet prej 560 milionë euro për vitin 2026, kurse Maqedonia e Veriut ka ndarë gjithsej 359 milionë euro për mbrojtjen, sipas TRT Balkan.
Ndërkohë, Mali i Zi ka miratuar një buxhet prej 78.9 milionë euro për vitin 2026, duke mbetur vendi me shpenzimet më të ulëta për mbrojtje në rajon.
Nga ana tjetër, Kosova mbetet i vetmi vend në rajon që ende nuk e ka miratuar buxhetin për mbrojtje për vitin 2026, si pasojë e zgjedhjeve të parakohshme parlamentare të mbajtura më 28 dhjetor 2025, të cilat kanë vonuar procesin e miratimit të buxhetit shtetëror.
