Ish-pjesëtari i Njësisë Speciale të Policisë së Kosovës, Arbnor Spahiu, të cilit iu shqiptua masa prej një muaji paraburgim në Serbi, dyshohet për kryerjen e veprës penale “vrasje e rëndë” në Banjskë.
Kështu ka bërë të ditur për Tëvë1 avokati Arianit Koci, i cili ka thënë se Arbnor Spahiu në atë kohë nuk ka punuar fare në polici.
“Ai në atë kohë, nuk ka punuar fare në polici. Diku rreth 1 vit më herët e ka lëshuar vullnetarisht policinë!”, tha ai.
E për këtë, avokati, Arbër Jashari ka deklaruar se është një vendim puro-politik i cili sipas tij nuk ka lidhje me drejtësinë.
Jashari tha se Serbia nuk ka juridiksion mbi shtetin e Kosovës dhe nuk mund ta zbatojë legjislacionin e vet për Kosovën.
“Është një vendim puro-politik i cili nuk ka lidhje me drejtësinë, Serbia e din shumë mirë që nuk ka juridiksion mbi shtetin e Kosovës dhe nuk mund ta zbatojë legjislacionin e vet për shtetin e Kosovës. Për veprat penale të cilat janë kryer në Kosovë edhe kundër shtetasve të Kosovës për veprat penale që Serbia supozon që i ka kry në Kosovë dhe ndaj shtetasve të Kosovës, kështu që ky është një vendim politik që nuk ka lidhje me drejtësinë. Serbia e ka humb juridiksionin mbi krejt Republikën e Kosovës qysh në vitin 1999 kur atë ia ka dorëzuar faktorit ndërkombëtar, por dihet shumë mirë që nga viti 2008 Republika e Kosovës e ka shpallur Pavarësinë dhe ushtron kontroll faktike dhe juridik mbi tërë territorin e Kosovës dhe këto veprime të Serbisë janë thjesht puro-politike për konsum të brendshëm ose për qëllime të tjera”, ka deklaruar avokati në emisionin “Ditari” në tëvë1.
Madje, ai ka thënë se Serbia me veprimet e saj po shkon drejt krijimit të tensioneve.
Sipas Jasharit, Serbia po e shkel ligjin ndërkombëtar duke provokuar tensione dhe situata të mosbesimit.
“Serbia me këto veprime po shkon drejt krijimit të tensioneve dhe po bënë raste të cilat nuk i ka bërë në të kaluarën, pavarësisht a ka qenë ai pjesëmarrës apo jo që sipas avokatit Koci as që ka qenë pjesëmarrës në sulmin e Banjskës, si zyrtar policor ose i Njësisë Speciale, e frikshme është rasti se si Serbia në raport me shtetin e Kosovës. Më shqetësuese është që Serbia po e shkel edhe ligjin ndërkombëtar edhe po provokon tensione dhe po krijon një situatë te keq besimi dhe në kthimin mbrapa që është bërë në shumë vite. Këto veprime duhet të i bëhen qartë Serbisë se nuk do të tolerohen që në të ardhmen mos të kemi të tilla ngjarje fatkeqësisht këto gjëra po shpeshtohen”, ka thënë ai ndër të tjera./teve1.info/
