Serbia edhe në zgjedhjet e 9 shkurtit ka ndërhyrë në zgjedhjet në Kosovë përmes Listës Serbe.
Përveç joshjes së serbëve me para që ka qenë taktikë në të kaluarën, në këto zgjedhje kishte edhe kërcënime e shantazhime për qytetarët për ta votuar Listën Serbe.
Pesë persona janë ndaluar në Zubin Potok për veprën penale “cenim i përcaktimit të lirë të votuesve”, disa ditë para mbajtjes së zgjedhjeve njoftoi Prokurori i Shtetit.
Por ky presion nuk mbaron me kaq. Pasi siguroi votat me metoda ndër më të ndryshmet, për të përfaqësuar kinse serbët në Kuvendin e Kosovës, Lista Serbe që dirigjohet drejtpërdrejt nga Serbia ka vënë një tjetër synim.
Ajo ka nisur të bëj trysni tek Bashkimi Evropian duke përdorur kështu publikimin e rezultateve finale në faqen zyrtare të Komisionit Qendror të Zgjedhjeve.
Pas kërcënimeve për serbët që ta votojnë Listën Serbe, Beogradi tash ka zgjedhur të “ankohet” te ambasadori i BE-së në Kosovë, Avio Orav, për (zgjedhjet) procesin më fer në Ballkan, siç edhe u konstatua nga shumë ndërkombëtarë.
Natyrisht, ankesave të Serbisë, i erdhi në ndihmë Sputniku i Vladimir Putinit, që ndodhet me zyrë në Serbi.
Agjencia shtetërore ruse e lajmeve që operon edhe në Serbi ka shpërndarë një lajm në të cilin shkruan se i ashtuquajturi Drejtori i Zyrës për Kosovën në Qeverinë serbe, Petar Petkoviq, ka pyetur ambasadorin e BE-së në Kosovë, Aivo Orav, se si ka mundësi që KQZ-ja për 20 orë nuk i ka futur të dhënat nga 0.83 % e vendvotimeve në tri komuna me shumicë serbe, pasi sipas tyre këto janë vota serbe të rëndësishme për Listën Serbe.
E përveç Sputnikut rus me bazë në Serbi, pretendimet që në vete bartin edhe presion kanë nisur edhe nga vet zyrtarët e Listës Serbe.
Sikurse Sputnik-u dhe Petkoviqi, dyshime për procesin zgjedhor në Kosovë që u konsiderua nga vëzhguesit ndërkombëtarë se ishte gjithëpërfshirës dhe paqësor, po hedh edhe nënkryetari i Listës Serbe, Dragisha Miloviq.
Edhe ky, njëjtë si eprori i tij u mundua të hedh baltë, me pretendimin se diçka e çuditshme po ndodh gjatë numërimit të votave në KQZ.
Duke u fshehur pas viktimizimit, nënkryetari i LS shprehu ‘frikën se dikush dëshiron të riformojë vullnetin e popullit serb’.
“Gjatë numërimit të votave, ne shohim që të paktën po ndodhin gjëra të çuditshme dhe pikërisht kjo ngre një dyshim të bazuar tek të gjithë ne në Listën Serbe se dikush dëshiron të riformojë vullnetin e qytetarëve serbë. Më shumë se 2500 vota serbe nuk u futën në sistem, gjë që tregon se dikush dëshiron t’i shtyjë të preferuarit e tyre në parlament. “Ai na kujton se Lista Serbe kishte të dhëna të sakta nga të gjitha komunitetet serbe dhe në bazë të këtyre të dhënave nuk ka dyshim se ne i kemi fituar të dhjetë mandatet”, ankohet Milloviq, i cili natyrisht shfrytëzoi momentin për t’i bërë thirrje përfaqësuesve të misionit vëzhgues që siç pretendon ai ‘të mbrojnë demokracinë’
