Në ditën e përvjetorit të rënies së regjimit të Bashar al-Asad, Sekretari i Përgjithshëm i OKB-së, Antonio Guterres, ka shprehur mbështetjen e plotë në tranzicionin e Sirisë drejt suksesit.
Ai i ka bërë homazh qëndrueshmërisë dhe rezistencës së popullit sirian i cili, siç tha ai, “nuk pushoi kurrë së ushqyeri shpresën pavarësisht vështirësive të paimagjinueshme”, duke e quajtur këtë një ditë për të nderuar sakrificat e tyre dhe për të ripërtërirë aspiratat që nxitën “ndryshimin historik”.
Guterres tha se përveç tranzicionit politik, Siria ka mundësi të rindërtojë komunitetet e shpërndara dhe të shërojë ndasitë e thella.
“Është një mundësi për të krijuar një komb ku çdo sirian – pavarësisht nga etnia, feja, gjinia apo përkatësia politike – mund të jetojë i sigurt, i barabartë dhe me dinjitet”, tha ai, citon Anadolu.
Shefi i OKB-së tha se megjithëse nevojat humanitare mbeten ende të mëdha, ai përmendi progresin që është bërë në rivendosjen e shërbimeve thelbësore, zgjerimin e aksesit humanitar dhe krijimin e rrugëve për kthimin e refugjatëve dhe personave të zhvendosur.
“Bashkësia ndërkombëtare duhet të qëndrojë fort pas këtij tranzicioni të udhëhequr nga Siria dhe të përvetësuar nga Siria”, tha ai. “Kjo përfshin sigurimin e respektit për sovranitetin e Sirisë, heqjen e barrierave ndaj rindërtimit, financimin e thirrjeve humanitare dhe promovimin e zhvillimit ekonomik.”
