Tentimi i 42-të për konstituim, u ndërpre më herët se që u planifikua.
Kjo meqë një telefonatë, i nxori nga salla plenare deputetët e Kuvendit të Kosovës edhe më shpejt se zakonisht. Këta të fundit u alarmuan për një bombë brenda objektit të Kuvendit.
Por, shumë shpejt kërcënimi doli të jetë i rremë. E vetëm një ditë më pas, autoritetet në Kosovë, zbuluan origjinën e telefonatës.
Autor i saj doli të jetë një shtetas serb me emrin Lazar Zhivkoviq.
“Numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS. Shfrytëzuesi i numrit ka qenë ose është shtetasi serb Lazar Živković. Në disa profile të lidhura me këtë numër është gjetur fotografia e kriminelit të luftës Ratko Mladić”, ka thënë Sveçla.
Sipas ministrit në detyrë të punëve të brendshme, Xhelal Sveçla, institucionet e Kosovës janë duke trajtuar rastin me prioritet të lartë.
Ndërsa ekspertët e sigurisë, tregojnë se çka po synohet përmes këtyre kercenimeve.
“Këtu e kanë parë që institucionet e Kosovës ende nuk janë formuar dhe Serbia mundohet t’i shfrytëzojë këto situata në favorin e saj, për t’i kamufluar situatën e vet që e ka në Serbi. Prandaj mundohet të bëj kalkulime politike.Organet ligjzbatuese në Kosovë e kanë marrë shumë seriozisht dhe kanë reaguar dhe në fund u pa që ishte spekulim”, ka thënë Jeton Halimi.
Por, a mund të përballet Kosova me një sulm të tillë?
“Rreziku mendoj që është potencial dhe besoj që institucionet e Republikës së Kosovës janë duke e monitoruar situatën me KFOR, EULEX dhe AKI-në dhe besoj i marrin veprimet e njëpasnjëshme dhe mendoj që nuk lejojnë ndonjë sulm ndaj institucioneve dhe popullatës”, ka thënë tutje Halimi.
Ndryshe, kërcënime të ngjashme ka pasur edhe më parë në drejtim të institucioneve në Kosovë.
