Me mijëra qytetarë serbë mbushën sheshin “Car Llazar” për të protestuar kundër vendimit për heqjen e dinarit serb. Qytetarët serb thonë se po iu rrezikohet ekzistenca me këtë vendim të Bankës Qendrore të Kosovës.
Rreth dy mijë serbë u mblodhën të hënën në sheshin “Car Llazar” në Mitrovicën e Veriut.
Kështu po e kundërshtojnë vendimin e Bankës Qendrore të Kosovës, që ndalon përdorimin e dinarit serb. Në këtë protestë prezentë ishin edhe politikanët lokalë serbë.
E as kësaj radhe nuk munguan pankartat nacionaliste.
Fjalimin e parë e mbajti, Dushanka Gjoroviç nga Shoqata e Pensionistëve, e cila tha se me heqjen e dinarit po i hiqet e drejta serbëve për jetë.
“Këtu kemi rritur fëmijët tanë dhe kemi pritur nipërit dhe mbesat. Vendimi për të hequr dinarin, për të pamundësuar ngritjen e pensioneve, do të thotë se na hiqet buka, na hiqet e drejta për jetë. Nëse dihet se në dyqane nuk ka ushqim serb, në barnatore nuk ka ilaçe serbe. Çfarë do të jetë me ne? Dua t’u shpjegoj të gjithëve gënjeshtrën e madhe se mund të hapim llogari në disa banka dhe të tërheqim pensionet”, tha Dushanka Gjoroviç nga Shoqata e Pensionistëve.
Mendim të ngjashëm për çështjen e dinarit, ka edhe profesoresha e ekonomisë, Dragana Milenkoviq.
“Heqja e dinarit, i cili u pre për herë të parë në vitin 1214 në territorin e Kosovës, më saktë në Novobërdë, do të thotë heqje e jetës për popullin tonë. Ky vendim vë në pikëpyetje se si prindërit do të blejnë ushqime për fëmijët e tyre, si do të marrin bursa studentët, si dhe nga çfarë do të paguajnë tarifat e shkollës, do të paguajnë provimet”, u shpreh Milenkoviq
Të mllefosur me heqjen e dinarit, u shprehën edhe banorët serbë, të cilët e shohin kryeministrin Kurti, si fajtorin kryesor.
“Është vetëm një nga veprimet, gjestet, njëri nga hapat të cilët, regjimi i Albin Kurtit, i ka ndërmarrë ndaj serbëve. Unë e përkrahi këtë mbledhje të popullit serb sot ku qytetarë të rëndomtë janë ngritur dhe shqetësohen nga këto veprime, që s’do të lejojnë atë agresion dhe terror që bëhet ndaj tyre”, deklaroi Shlomo Damjanoviq.
“Paj, Kurti ka bë diçka edhe kundër shqiptarëve edhe kundër serbëve. Kemi qenë mirë, shokë. Jemi shoqëruar, kemi qenë si vëllezër. Si me shqiptarët edhe me serbët. Ka qenë vend shumë i mirë. Këtë na e kanë shkatërruar vetëm të huajt”, tha një qytetar serb.
E njëri nga protestuesit nuk u shqetësua shumë për dinarin, por fliste me nostalgji për kohën e studimeve në Prishtinë, dhe tregoi se më cilët shqiptarë ishte shoqëruar.
Protesta zgjati rreth gjysmë ore, më pastaj qytetarët u shpërndanë në mënyrë paqësore.
