Janë bërë tri vjet prej kur janë vendosur.
Që nga ajo kohë, këta semaforë në Komunën e Vitisë kanë qenë funksionalë vetëm pak ditë pas vendosjes së tyre.
Mosfunksionimi i tyre po shkakton tollovi në udhëkryqin që lidh Vitinë me Ferizajn por edhe fshatrat tjerë përreth.
Por, këtë problem thotë se do ta zgjidh shumë shpejt, kryetari i Komunës, Sokol Haliti.
Ai tregon se sipas planit të mobilitetit, aty pritet të vendoset një rrethrrotullim i cili sipas tij do e ndihmon lëvizjen e lirë të veturave.
“Jemi në planifikim të projekteve të reja për shkak se plani i mobilitetit e ka paraparë vendosjen e semaforëve por tash mas vendosjes së semaforëve dhe investimeve ka zëra tjerë dhe pengesa dhe inibicione në qarkullimin e komunikacionit edhe më shumë. Prandaj një rrethtrrotullim po kërkohet por kemi nevojë për disa shpronësime për shkak se i pengojmë pronat private”, tha kryetari Haliti.
E këtë ide po e përkrahin disa qytetarë, të cilët thonë se një zgjidhje duhet të bëhet sa më parë në mënyrë që të ketë lëvizje më të lirë të veturave.
“Po normal lëvizja ma e lirë ish bë më në rregull kish shku gjithçka sipas mendimit tim kryetari i Komunës e ka në kompetencë këtë çështje”, tha një qytetar nga Vitia.
“Rrethi ku jetojmë ne semaforët nuk janë funksional, më shumë po ndikojnë pozitiv në komunikacion rrethi sesa semafori e ka program 60 sekonda me nejt, kalojnë 50 kerre, a këtu duhet me prit 50 kerre rend. Në krejt botën semaforat kanë rënë prej përdorimi, kjo është një qytezë e vogël, hargjime bën me bw por kurrfarë ndryshimi s’ka bë në komunikacion veç na ka pengu”, tha një tjetër banor i Vitisë.
Por, nga opozita në këtë komunë, nuk janë të kënaqur me nivelin e punimeve që po realizohen nga pushteti lokal.
Asamblistja, Liridona Bislimi nga Lëvizja Vetëvendosje po vlerëson se kjo është pasqyrim i neglizhencës nga niveli komunal.
