Deputeti nga radhët e Lidhjes Demokratike të Kosovës (LDK), Driton Selmanaj ka kritikuar kryeministrin Albin Kurti për kujtimin e politikanit serb, Oliver Ivanoviq para dy javësh. Ai po ashtu hodhi kritika edhe ndaj presidentes Vjosa Osmani, e kryeparlamentarit Glauk Konjufca për mos reagim.
Në seancën që po mbahet në Kuvend, Selmanaj tha se heshtja e tyre e konstaton se edhe ata mendojnë sikurse Kurti, që Ivanoviqi ishte një person që ka punuar për të ardhmen e Kosovës, përcjell teve1.info
“Për fatin e keq, nuk ka asnjë fjalë dhe distancim tash e dy javë as nga presidentja e vendit, as nga kryeparlamnetari dhe as nga deputetët e shumicës paralamentare. Heshtja e juaj bën që të konstatojë se ngjashëm siç e cilësoi kryeministri, edhe ju mendoni se një vrasës i shqiptarëve paska qenë person i sinqertë, i hapur e i përkushtuar, i mprehtë e i respektueshëm e që paska punuar për të ardhmen e qëndrueshme dhe për Kosovën shumetnike”, deklaroi ai.
Sipas tij, “Ivanoviq i tillë mund të jetë vetëm për Albin Kurtin, Vjosa Osmanin e Glauk Konjufcën e të gjithë ata që mendojnë ngjashëm si ta”.
Deputeti i LDK-së theksoi se thirrjet e kryeministrit Kurti që të ruhet kujtimi për Ivanoviqin janë shëmtia më e rëndë që i është bërë popullit të Kosovës që nga çlirimi në vitin 1999.
“Shqiptarët nuk e meritojnë këtë turpërim, shqiptarët nuk e meritojnë këtë përbuzje”, shtoi ai.
Selmanaj po ashtu u bëri thirrje deputetëve që të distancohen publikisht “nga ky akt kundër historisë” së Kosovës.
Deklarata e kryeministrit Kurti se do donte që kujtimi i Ivanoviqit të mbetet i gjallë si një njeri që punoi për një të ardhme të qëndrueshme dhe për një Kosovë shumetnike, ngjalli reagime të shumta në vend e madje u cilësua edhe si shumë shqetësuese. /Teve1.info/
