Ish shefi i grupit parlamentar të Lëvizjes Vetëvendosje, njëherit ish-anëtar i UÇK-së, Rexhep Selimi e ka mbajtur njw fjalim para Gjykatës Speciale, raporton teve1.info
Fillimisht, ai është deklaruar i pafajshëm në lidhje me krimet e pretenduara në aktakuzë.
“Ka pothuajse dy vjet e gjysmë që kur u njoftova se ndaj meje është ngritur aktakuzë ndaj Gjykatës Speciale. Nuk e prisja. Sido që rrodhën ngjarjet jemi këtu përballë një aktakuze që me të drejtë e konsiderojmë të pabazuar në fakte e argumente. Përballë kësaj aktakuze deklarohem se nuk kam të bëjë asgjë me krimet e pretenduara në aktakuzë”, tha Selimi.
Ai e vazhdoi rrëfimin duke thënë se në vitet e ‘90-ta nuk mund të hyje as në fakultete e bibloteka.
“Në fillim të viteve të 90-ta isha student në Filologji. Si kudo në Kosovë edhe në Universitetin e Prishtinës u përshkallëzua dhuna. Më kujtuan kur na dëbuan nga konviktet. Më 16 mars 1990 rreth Qendrës së Studentëve shihje blinda duke nxjerrë studentë jashtë. Nuk mund të hyje në fakultete as bibilotekë. Shqiptarët u larguan nga puna, nuk kishte më polic shqiptar, as mjek shqiptar, as nënpunës në administratë. Të rinjtë shqiptarë nuk mund të luanin as futboll, u mbyll televizioni në gjuhën shqipe, dhe u mbyllën gazetat”, ka deklaruar ai.
Selimi tha se gjatë asaj kohe të para luftës dhuna përshkallëzohej.
“Të rinjtë dërgoheshin me dhunë në Ushtrinë Jugosllave. Jo për të shërbyer, por për të na vrarë. Si sot më kujtohet kur bashkëmoshatarin tim Jetullah Desku e dërguan në ushtri, e më pas e kthyen në arkivol duke thënë se e ka vrarë vetën”, u shpreh Selimi.
Tutje, Selimi ka thënë se u bë pjesë e një aktakuze nga Serbia, dhe se aty ishte edhe Adem Jashari.
“Unë u bëra pjesë e një aktakuze nga Serbia dhe aty ishte edhe Adem Jashari. Unë nuk mund të qëndroja në shtëpinë time. U detyrova me dajën tim Mujë Krasniqin në tetor 1996 të largoheshim nga shtëpitë tona. Prej asaj kohe kryesisht qëndroja me familjen Jashari dhe jo vetëm. Aty qëndroja me Ademin, Shabanin, Hamzën, me fëmijët e asaj familje, Fitim, Besimin. Të gjithë këta fëmijë më pas u vranë. Më 5 mars 1998 filloi sulmi mbi familjen Jashari në Prekaz. Në ditën e sulmit nuk ndodhesha aty, prandaj jam gjallë. Përndryshe do ta kisha fatin e atyre që ranë atë ditë në tri ditë që njihen si tri ditët e Epopesë së UÇK-së”, tha ai.