Ish-komandanti i Ushtrisë Çlirimtare të Kosovës Sylejman Selimi dhe ish-pjesëtari i UÇK-së, Jahir Demaku janë liruar nga akuza për krime lufte ndaj popullatës civile në rastin e njohur si “Drenica 1”.
Ndaj Selimit dhe Demakut rëndonte akuza se në një datë të papërcaktuar të muajve gusht-shtator 1998, kishin keqtrajtuar një person të paidentifikuar në qendrën e ndalimit në Likoc.
“Nuk është provuar se të akuzuarit kanë kryer veprën penale që u vihet në barrë andaj edhe të njëjti i liroj nga akuza”, tha kryetari i trupit gjykues, Ngadhnjim Arrni.
Sipas kryetarit të trupit gjykues, dëshmia e dëshmitarit A ka qenë e mangët pasi nuk është mbështetur në asnjë provë tjetër.
“Fillimisht nuk është arritur të vërtetohet se cilit person ia kanë cenuar integritetin dhe shëndetin tani të akuzuarit për faktin se viktima asnjëherë nuk është arritur të identifikohet dhe nuk është arritur të identifikohen dëshmitarë të tjerë potencial në të cilat do të mbështetej dëshmia e dëshmitarit A”, tha ai.
Derisa nga mbrojtja e të akuzuarve, kanë thënë se janë të kënaqur me këtë vendim.
“Ne gjatë gjithë kohës kemi potencuar se kjo akuzë është e rrejshme gjë që e vërtetoi edhe gjykata ngase deklarimet e dëshmitarit A për këtë pikë të aktakuzës kanë qenë jashtëzakonisht kundërthënëse dhe nuk kanë pas mbështetje në provat e tjera”, u shpreh Artan Qerkini, avokat i Sylejman Selimit.
Prokuroria Speciale kishte ngritur aktakuzë ndaj 15 personave, por që me aktvendim aktakuza është ndarë në dy akuza, “Drenica 1” dhe “Drenica 2”.
Sylejman Selimi ishte dënuar në rastin “Drenica 1” me 6 vjet por rasti ishte kthyer në rigjykim.
Kronika e realizuar nga gazetarja Gresa Bardhecaj